धरती पुत्री माँ जानकीक प्राकट्य दिवस जानकी नवमी विद्यापति सेवा संस्थानक तत्वावधानमे 6 मईकें धूमधामसँ मनायल जायत। संस्थानक प्रधान कार्यालय परिसरमे प्रातः काल धनुर्धारिणी माता जानकी केर आदमकद प्रतिमाक शास्त्रीय विधिसँ पूजा-अर्चना होयत। एकर बाद मैथिली दिवस समारोहक भव्य आयोजन कयल जायत।
आयोजनक चलि रहल तैयारीक बावत महासचिव डा बैद्यनाथ चौधरी बैजू मंगलदिन जनतब देलनि जे संस्थान अनेक दशकसँ जानकी नवमीक आयोजन करैत आबि रहल अछि। जखनि कि बीतल एक दशकसँ बेसी समयसँ मूर्ति पूजा सेहो कयल जा रहल अछि। जानकी नवमी केर विस्तार-अभियान निरंतर प्रगति क’ रहल अछि। आइ राष्ट्रीय स्तर पर हजारों स्थान पर जानकी नवमी समारोहपूर्वक मनाओल जयबाक क्रम आरंभ भ’ चुकल अछि। ओतहि अमेरिका, जर्मनी, कैलिफोर्निया, रूस आदि देशमे सेहो प्रवासी मिथिलावासी जानकी नवमी केर आयोजन क’ रहलनि अछि।
ओ बतेलनि जे संस्थानक जानकी नवमी समारोहमे संस्थानक संरक्षक द्वय क्रमशः ललित नारायण मिथिला विश्वविद्यालयक कुलपति प्रो संजय कुमार चौधरी आ कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय संग कामेश्वर सिंह दरभंगा संस्कृत विश्वविद्यालयक पूर्व कुलपति प्रो शशिनाथ झा, प्रो देव नारायण झा, प्रो रामचंद्र झा, प्रो उपेंद्र झा आदिक गरिमामय उपस्थिति रहत।
डा बैजू जानकी पूजन अभियानमे जुटल सभ संस्थाकें साधुवाद दैत मिथिलाक घर-घरमे जानकी पूजन सुनिश्चित करबाक आह्वान कयलनि ताकि मिथिलामे नारी सशक्तिकरणक पारम्परिक अभियान आओर बेसी विस्तार ल’ सकय। मैथिली अकादमीक पूर्व अध्यक्ष पं कमलाकांत झा कहलनि जे विद्यापति सेवा संस्थानक सभ-घर जानकी पूजन महाभियानकें मिथिलावासी आ प्रवासी मैथिलक भरपूर सहयोग आ समर्थन भेटि रहल अछि। एकर सुखद परिणामक रूपमे देश-विदेशमे शिवधनुर्धारिणी जानकी नवमी समारोहक धूम सामने अछि।
एहि अवसर पर आयोजित होबय बला जानकी-सम्मेलनक संयोजिका डा सुषमा झा बतेलनि जे सम्मेलनमे सहभागिता लेल मिथिलाक नारी शक्ति विशेष रूपसँ उत्साहित छथि आ सभ माय-बहिन कें एहिमे शामिल होयबा लेल लगातार जनसंपर्क अभियान चलाओल जा रहल अछि।
मीडिया संयोजक प्रवीण कुमार झा बतेलनि जे एहि अवसर पर नारी सशक्तिकरण केर क्षेत्रमे उत्कृष्ट योगदान लेल संस्थान द्वारा प्रतिवर्ष देल जाय बला जानकी सम्मान प्रदान कयल जायत। ओ बतेलनि जे जानकी नवमी पर सभ घर जानकी पूजनोत्सव सुनिश्चित करबा लेल संस्थान दिसिसँ शिवधनुषधारिणी माँ जानकी केर चित्र बला कैलेंडर घर-घर वितरित कयल जयबाक तैयारी अंतिम चरणमे अछि।
जखनकि संस्थानक सचिव प्रो जीवकांत मिश्र केर प्रस्ताव पर मैथिली दिवस समारोह केर सांस्कृतिक सत्रमे विशेष रूपसँ महिला कलाकारकें आमंत्रित कयल जा रहल अछि, जिनकर पारंपरिक प्रस्तुति विशेष आकर्षणक केंद्र विंदु बनत।
