पूर्व सांसद स्व.भोगेन्द्र झाक 17म पुण्य तिथि पर विद्यापति सेवा संस्थानक महासचिव डॉ बैद्यनाथ चौधरी बैजू सोमदिन भोरे आयकर चौराहा स्थित हुनक प्रतिमा पर संस्थानक दिसिसँ माल्यार्पण कऽ हुनका भाव भरल श्रद्धांजलि अर्पित कयलनि। श्रद्धा सुमन अर्पित करैत ओ कहलनि जे भोगेन्द्र बाबू आजीवन मिथिलाक विकास लेल संघर्षरत रहलाह। बिजली, बाढ़ि, सुखाड़ सहित अनेक विकासात्मक मुद्दाकें लऽ संसदसँ सड़क धरि कयल अपन संघर्ष लेल ओ मिथिलाक जन-जन केर स्मृतिमे सदति जीवंत बनल रहताह।
मैथिली अकादमीक पूर्व अध्यक्ष पं कमला कांत झा कहलनि जे लोक सभामे पहिल बेर मातृभाषा मैथिलीमे शपथ ग्रहण कऽ बनाओल गेल हुनक कीर्तिमान आ मैथिलीकें संविधानक आठम अनुसूचीमे शामिल करेबामे निमाहल अपन भूमिका लेल ओ सदति अमर रहताह।
संस्थानक कार्यकारी अध्यक्ष डॉ बुचरू पासवान हुनका मिथिला मैथिलीक विकास लेल सतत चिंतनशील रहय बला हितचिंतक बतेलनि। प्रो जीवकांत मिश्र दिवंगत पुण्यात्माकें एकटा नेक लोक, कुशल सामाजिक कार्यकर्ता, मिलनसार स्वभावक इमानदार नेता आ मिथिला मैथिली केर विकासक समर्पित हितैषी बतेलनि।
मणिकांत झा हुनका मिथिला मैथिली केर विकासक समर्पित समाजसेवी बतेलनि।
मीडिया संयोजक प्रवीण कुमार झा हुनका समाज सेवाक रस्ते राजनीति साधय बला एकटा मजगूत स्तंभ बतेलनि। पूर्व सांसदकें श्रद्धांजलि अर्पित करय बला अन्य लोकमे प्रो विजय कांत झा, विनोद कुमार झा, डॉ गणेश कांत झा, प्रो चन्द्र शेखर झा बूढाभाई, नवल किशोर झा, आशीष चौधरी, पुरुषोत्तम वत्स आदि शामिल छलाह।
