पूर्व मुख्यमंत्री डा जगन्नाथ मिश्रक पांँचम पुण्यतिथि पर विद्यापति सेवा संस्थान सोमदिन शोक संवेदना जतेलक। संस्थानक महासचिव डाॅ बैद्यनाथ चौधरी बैजू कहलनि जे प्राथमिकसँ उच्च शिक्षा धरिक उन्नयन लेल हुनका द्वारा कयल गेल काज यथा, ललित नारायण मिथिला विश्वविद्यालय, संस्कृत शिक्षा बोर्ड आ मैथिली अकादमीक स्थापना सहित विभिन्न महाविद्यालयक अंगीभूतीकरणमे हुनक योगदानकेँ कहियो बिसरल नहिं जा सकैत अछि।
मैथिली अकादमीक पूर्व अध्यक्ष पं कमलाकांत झा कहलनि जे एकटा कुशल प्रशासक, प्रखर वक्ता, लोकप्रिय राजनेता ओ महान अर्थशास्त्रीक रूपमे ओ सदति जीवंत बनल रहताह।
संस्थानक कार्यकारी अध्यक्ष डाॅ बुचरू पासवान कहलनि जे दरभंगामे आकाशवाणीक शुभारम्भ करबा आ कार्यकर्ता लोकनिकेँ निरंतर अपना हाथक लिखल चिट्ठी पठेबा लेल ओ सदैव याद कयल जयताह।
प्रो जीव कांत मिश्र कहलनि जे मिलनसार स्वभाव बला नेता आ गरीबक मसीहाक रूपमे ओ सदति याद कयल जयताह।
प्रवीण कुमार झा हुनका अध्ययनशील राजनेता बतबैत कहलनि जे शिक्षा, राजनीति आ अर्थशास्त्रक क्षेत्रमे देल गेल हुनक योगदान सदैव अविस्मरणीय रहत।
श्रद्धांजलि देनिहार अन्य लोकमे डाॅ महेन्द्र नारायण राम, प्रो चंद्रशेखर झा बूढ़ा भाई, विनोद कुमार झा, प्रो विजय कांत झा, डा उदय कांत मिश्र, डा गणेश कांत झा, दुर्गानंद झा, आशीष चौधरी, पुरुषोत्तम वत्स, मणिभूषण राजू आदि शामिल छलथि।
