राज्यसभा सदस्यक रूपमे मातृभाषा मैथिलीमे शपथग्रहण केनिहार सांसदकें विद्यापति सेवा संस्थान सम्मानित करत। ई जानकारी दैत संस्थानक महासचिव डॉ बैद्यनाथ चौधरी बैजू बतोलनि जे मैथिलीमे शपथ ग्रहण कऽ राज्यसभाक नव निर्वाचित सांसद डॉ धर्मशीला गुप्ता, संजय कुमार झा आ मनोज झा मातृभाषा मैथिलीक मान आ सम्मान बढ़ेलनि अछि। एहि लेल हिनका लोकनिकें संस्थानक दिससँ आगामी नवम्बर महीनामे आयोजित होबय बला 52म मिथिला विभूति पर्व समारोहक दौरान सम्मानित कयल जायत।
संस्थानक अध्यक्ष सह कामेश्वर सिंह दरभंगा संस्कृत विश्वविद्यालयक पूर्व कुलपति प्रो शशिनाथ झा मैथिली केर प्रति जन प्रतिनिधि लोकनिमे बढ़ि रहल उत्साहकें देखैत उम्मीद जतोलनि जे हिनका लोकनिक सकारात्मक पहलसँ केंद्र आ राज्य सरकार मिथिला ओ मैथिली केर सर्वांगीण विकासक मार्ग प्रशस्त करबाक प्रति तत्पर होयत।
विभिन्न राजनीतिक दलसँ संबद्ध नव मनोनीत राज्यसभा सदस्य लोकनि द्वारा मैथिलीमे शपथ लेल जयबा पर प्रसन्नता व्यक्त केनिहार लोकनिमे मैथिली अकादमीक पूर्व अध्यक्ष पं कमलाकांत झा, संस्थानक सचिव प्रो जीवकांत मिश्र, वरिष्ठ साहित्यकार मणिकांत झा, डॉ महेंद्र नारायण राम, शोभा यात्रा प्रभारी द्वय विनोद कुमार झा व प्रो विजय कांत झा, मीडिया संयोजक प्रवीण कुमार झा, कोषाध्यक्ष डाॅ गणेश कांत झा, पुरुषोत्तम वत्स, दुर्गा नन्द झा, डॉ महानंद ठाकुर, नवल किशोर झा, आदि शामिल छलाह।
