पूर्णियाक सांसद राजेश रंजन उर्फ पप्पू यादवक पिता चन्द्र नारायण प्रसादक निधन पर विद्यापति सेवा संस्थानक प्रतिनिधि मंडल बुधदिन पप्पू यादवसँ भेंट कऽ शोक संवेदना जतेलक। संस्थानक महासचिव डा बैद्यनाथ चौधरी बैजू केर नेतृत्वमे हुनक पूर्णिया स्थित आवास पर पहुंँचल प्रतिनिधि मंडल शोक संवेदना व्यक्त कयलक आ दिवंगत पुण्यात्माक तैल चित्र पर पुष्प अर्पित कऽ भाव भरल श्रद्धांजलि देलक।
मौका पर डा बैजू अपन संदेशमे पप्पू यादवक पिताकें मिलनसार स्वभाव बला मिथिला-मैथिलीक विकासक सुच्चा हितचिंतक बतेलनि। ओ कहलनि जे सामाजिक सरोकार सँ गँहीर संबंध रखनिहार स्व चन्द्र नारायण प्रसाद बहुगुण संपन्न व्यक्तित्व छलाह।
प्रतिनिधि मंडलमे डा बैजू संग डा गणेश कांत झा, मनीष झा रघु आ संस्थानक मीडिया संयोजक प्रवीण कुमार झा शामिल छलाह। प्रवीण कुमार झा पप्पू यादवक पिताकें कर्तव्यनिष्ठ समाजसेवी बतबैत हुनका मातृभाषा मैथिलीक असीम अनुरागी बतेलनि। ओ कहलनि जे ई पप्पू यादवक पिताक अपन मातृभाषा मैथिलीक प्रति असीम अनुराग छलनि जे ओ अपन पुत्र आ पुत्रवधूकेँ सांसदक रूपमे मैथिलीमे शपथ ग्रहण करबा लेल प्रेरित कयलनि।
प्रतिनिधि मंडल भारतीय जनता पार्टीक युवा मोर्चाक दरभंगा जिला अध्यक्ष बालेंदु झाक पिता निरंजन कुमार झाक निधन पर सेहो शोक संवेदना व्यक्त कयलनि। शुभंकरपुर स्थित बालेंदु झाक आवास पर पहुंँचि ओ लोकनि शोक संतप्त परिवारकें सांत्वना दैत दिवंगत पुण्यात्माकें श्रद्धांजलि अर्पित कयलनि। मौका पर डा बैजू बालेंदुक पिताकें त्यागी पुरुष बतबैत कहलनि जे अपन कृतित्व आ व्यक्तित्व लेल ओ सदति जीवंत बनल रहताह। एहि दौरान विनोद कुमार झा, संतोष कुमार झा, आशीष चौधरी, पुरुषोत्तम वत्स, मणिभूषण राजू आदि सेहो हिनका लोकनिक संग रहथि।
