पश्चिम चंपारण जिलामे ओहि समय मातम छा गेल जखनि उत्तराखंडक धरालीमे पहाड़ खसय केर भयावह घटनामे जिलाक 11 मजदूरक मौतक खबर आयल। 5 अगस्तकेँ भारी बरखाक कारण भेल इ दुर्घटना कतेको परिवारकेँ तबाह कय देलक। घटनाक पांच दिन बाद सेहो बिहारक 11 लोकक कोनो पता नहिं अछि।
सबसँ बेसी नुकसान पश्चिम चंपारणक सरगटीया पंचायतक मगलहिया गामकेँ भेल अछि। जतयकेँ 8 गोटे लापता भऽ गेल। संगहि घोघा पंचायतक 3 मजदूरकेँ लापता होबय केर खबरि अछि। लापतामे एकहि परिवारक तीन सदस्य देवराज शर्मा आ हुनक दूटा बेटा अनिल कुमार आ सुशील कुमार सेहो शामिल छथि।
दुर्घटनासँ पहिने मजदूर अपन परिवारक लोकसँ फोन पर गप कयने छल आ कहलक जे ओहि दिन भारी बरखाक कारण काज बंद अछि। ओ सभ कोठलीमे आराम कय रहल छलाह। करीब एक घंटा बाद सोशल मीडियाक माध्यमसँ दुर्घटनाक खबरि भेटल, मुदा ता धरि ककरो कोनो अंदाजा नहि छल जे ई लोक सेहो एहिमे फंसल छथि। बेर-बेर फोन कयलाक बादो जखनि मोबाइल बंद भेटल तँ फेर परिवारक लोककेँ किछु अप्रिय केर आशंका भेल।
स्थानीय ठेकेदार फोन पर परिवारक लोककेँ कहलक जे प्रशासन तलाशी लेलक, मुदा मलबामे बेसी भीतर दबल मजदूरक पता नहि चलि सकल। एकर बाद परिवारक सदस्य रविदिन प्रतीकात्मक रूपसँ मूर्तिकेँ अंतिम संस्कार कय श्राद्धक तैयारी शुरू कयलनि, मुदा एखनि धरि हुनका लोकनिक मृत्युक पुष्टि नहि भेल अछि ।
लापता 5 गोटेमे ब्रजेश यादव (27 वर्ष), संदीप कुमार (20 वर्ष), संदीप कुमार (20 वर्ष) तीनू मंगलहिया गाँव, सरगतिया पंचायत, अनिल कुमार आ सुशील कुमार शामिल छथि।
धराली दुर्घटनामे जान गंवा चुकल सब लोक रोजी-रोटी लेल उत्तराखंड गेल छलाह। आब हुनका लोकनिक गाममे मात्र चुप्पी आ शोक पसरल अछि। एम्हर स्थानीय सिकटा विधायक वीरेंद्र गुप्ता गाम पहुँचि परिवारक सदस्यकेँ सान्त्वना देलनि। एकर संग-संग ओ बिहार सरकार आ उत्तराखंड सरकारसँ 20 लाखक मुआवजाक मांग कय रहल छथि।
ओ कहलनि जे, सरकार प्रकृतिक संग खिलवाड़ कय रहल अछि, जाहि कारण पहाड़ गिरय आ दुर्घटनाक खबरि सब दिन आबैत रहैत अछि। संगहि प्रकृतिक संग खिलवाड़ नहि करबाक मांग कयलनि।
जनतब जे उत्तराखंडक उत्तरकाशी जिलाक धराली गाममे लगातार बरखाक कारण 5 अगस्तकेँ एकटा पहाड़ खिसकि कय बस्ती पर खसि पड़ल, जाहि केर कारण पूरा गाम मलबाक नीचा दबि गेल। एहि दुर्घटनामे पश्चिम चंपारण जिलाक विभिन्न क्षेत्रक 11 गोटे लापता भऽ गेल।
