राष्ट्रपति डोनाल्ड ट्रम्प अमेरिकी सेनाक पुनर्गठन पर केन्द्रित एकटा कार्यकारी आदेश पर हस्ताक्षर कयलनि अछि। सोमदिन देर राति हस्ताक्षरित एकटा आदेशमे सेनामे विविधता, समानता आ समावेशन (डीईआई) पहल पर रोक लगा देल गेल अछि।
एकटा आओर आदेशमे ८,००० सँ बेसी सेवा सदस्यकेँ बहाल कऽ देल गेल जकरा कोविड-१९ टीका लेबासँ मना करबाक कारणेँ बर्खास्त कऽ देल गेल छल।
व्हाइट हाउस कहलक जे तेसर कार्यकारी आदेशमे अधिकारी सभकेँ ट्रांसजेंडर सैनिकसभ पर नीति विकसित करबाक काज देल गेल छल।
मीडिया रिपोर्टक अनुसार, आदेशमे ट्रांसजेंडर सेवाक सदस्य सभपर तत्काल प्रतिबन्ध नहि लगाओल गेल अछि।
चारिम आदेश “अमेरिकन आयरन डोम” विकसित करबाक प्रक्रियाकेँ अनिवार्य करैत अछि। ई मध्य पूर्वमे इजरायली गुंबद जकाँ होएत।
पेंटागनक नेतृत्व करबाक लेल ट्रम्पक नामांकित पीट हेगसेथ शनिदिन रक्षा सचिवक रूपमे शपथ लेलाक बाद ई आदेश जारी कयल गेल।
हेगसेठ बहुत दिनसँ कहैत आबि रहल छथि जे हुनकर योजना सेनामे पैघ सांस्कृतिक परिवर्तन लागू करबाक अछि। सोमदिन पेंटागन पहुँचलाक किछुए देर बाद ओ कहलनि, “कार्यकारी आदेश आबय जा रहल अछि।”
ट्रम्प अपन पहिल प्रशासनक अवधि २०१७मे ट्रांसजेंडर अमेरिकी सभकेँ सेनामे सेवा करबापर प्रतिबन्ध लगा देलनि, मुदा तखनि तत्कालीन राष्ट्रपति जो बाइडेन २०२१मे प्रतिबन्धकेँ निरस्त करबाक आदेश जारी कयलनि।
रिपोर्टक अनुसार, ट्रम्प द्वारा हस्ताक्षरित कार्यकारी आदेश सेनाकेँ ट्रांसजेंडर सैनिक सभकेँ शामिल करबाक संबंधमे नीति विकसित करबाक आ एहि विषय पर कोनो दिशा-निर्देशकेँ अद्यतन करबाक निर्देश दैत अछि। ई कारवाई ट्रांसजेंडर सेवा सदस्य सभपर तत्काल प्रतिबन्ध नहि लगाओत।
व्हाइट हाउस द्वारा प्रकाशित दस्तावेजक अनुसार, “सैन्य उत्कृष्टता आ तत्परताकेँ प्राथमिकता देब” पर राष्ट्रपतिक कार्यकारी आदेशमे कहल गेल अछि जे “कोनो व्यक्तिक लिंगसँ अलग झूठ ‘लिंग पहिचान’ व्यक्त करब सैन्य सेवाक लेल आवश्यक कठोर मानककेँ पूरा नहि कऽ सकैत अछि।”
व्हाइट हाउसक एकटा तथ्य पत्रमे ‘ट्रांसजेन्डर’क बदला ‘ट्रांस-आइडेंटिफ़ाइंग’ शब्दक प्रयोग कयल गेल अछि। ई स्पष्ट नहि अछि जे अमेरिकी सेनामे कतेक ट्रांसजेंडर कर्मी सेवा दैत छथि – यद्यपि शोधकर्ता सभक पछिला अनुमानक अनुसार ई आंकड़ा ९,००० सँ १५,००० के बीच छैक।
आदेशमे इहो कहल गेल अछि जे पुरुष सभकेँ महिलाक लेल निर्धारित सुविधाक उपयोग करबासँ स्पष्ट रूपसँ मना कयल जायत।
ट्रांसजेंडर सैन्य कर्मीक वकालत करयवला संगठन स्पार्टा एहि आदेशक आलोचना करैत कहलक जे ट्रांसजेंडर सैनिक युद्ध क्षेत्रमे सेवा देने छथि आ सैन्य इकाइ सभमे सेवा करबाक “अपन क्षमताक प्रदर्शन” कयलनि अछि।
