यूएस-इजरायल हमलासँ  होर्मुज स्ट्रेट बंद: चीन 

नई दिल्ली । समदिया

चीन स्ट्रेट ऑफ होर्मुज केर वर्तमान हालातक लेल अमेरिका आ इजरायलकेँ जिम्मेदार ठहरेलक अछि। बीजिंगक अनुसार ईरान पर दुनू देशक सैन्य कारवाईक कारण होर्मुज लगभग बन्द भऽ गेल अछि। चीनक कहब अछि जे ई हमला एहि समस्याक ‘जड़ि’ अछि। अमेरिकाक राष्ट्रपति डोनाल्ड ट्रंप बुधदिन राति (स्थानीय समय अनुसार) अमेरिकी नागरिकक नाम संबोधनमे होर्मुजक जिम्मेदारी स्वीकार करबासँ बचलाह (जखनिकि पहिने ओ एहि पर अधिकार जतौने छलाह)। ट्रंप कहलाह कि जे लोक एहि मुख्य शिपिंग मार्गसँ तेल प्राप्त करइत अछि हुनका ‘एहि मार्गक सुरक्षाक जिम्मेदारी’ स्वयं उठेबाक चाही। जखनि पत्रकारसभ चीनक विदेश मंत्रालयक प्रवक्ता माओ निंगसँ ट्रंपक एहि टिप्पणीक प्रतिक्रिया पूछल, तऽ ओ कहलनि : “होर्मुज जलडमरूमध्यमे रुकावटक मूल कारण, यूएस-इजरायल द्वारा ईरानक खिलाफ चलाओल जा रहल अवैध सैन्य अभियान अछि। होर्मुज स्ट्रेटमे चलि रहल तनावक जड़ि गैरकानूनी सैन्य कार्रवाई अछि, जे वैश्विक अर्थव्यवस्था आ ऊर्जा सुरक्षा लेल खतरा बनि सकैत अछि।” एकर संगहि चिनक विदेश मंत्रालय सभ पक्षसँ तुरंत संघर्ष विराम करबाक अपील कयलक। माओ निंग कहलनि जे सैन्य कार्रवाईसँ समस्याक समाधान नहि भ’ सकैत अछि। ओ कहलनि जे संघर्ष बढ़ेनाई केकरो हितमे नहि अछि आ सभ पक्षकेँ तुरंत सैन्य अभियान रोकबाक चाही। ओ कहलनि जे सभ देशकेँ संयम बरतैत बातचीतसँ समाधान निकालबाक चाही। एहि बीच वर्तमान परिस्थितिक सही समाधान निकालबाक लेल ब्रिटिश पीएम कीर स्टार्मर 35 देशक बैठक बजौलनि, जाहिमे विभिन्न देशक प्रतिनिधि स्ट्रेटकेँ फेरसँ खोलबाक लेल कूटनीतिक विकल्प पर चर्चा करताह। बैठकमे अमेरिका, यूरोप आ खाड़ी देश सभक साझेदार शामिल छथि। स्टार्मरकअनुसार एहि केर मुख्य उद्देश्य समुद्री सुरक्षा सुनिश्चित करब आ बाधित तेल आपूर्तिकेँ दोबारा सुचारू करब अछि। स्टार्मर स्पष्ट रूपेँ कहि चुकल छथि जे ब्रिटेन युद्धमे भाग नहि लेत, मुदा ऊर्जा सुरक्षा लेल कूटनीतिक डेग जरूर उठाओत।