एनडीआई गठबंधनक प्रमुख नेता राजद प्रमुख लालू प्रसाद यादव मुसलमानक लेल आरक्षणक समर्थन कयलनि अछि। आब हुनक बयानक बाद एकटा नव विवादक संभावना बढ़ि गेल अछि।
लोकसभा चुनाव २०२४ केर तेसर चरणक मतदान मंगल, ७ मईकेँ भेल। एहि चुनावक दौरान देशमे मुस्लिम आरक्षण एकटा पैघ मुद्दाक रूपमे उभरल अछि। भाजपा लगातार आईएनडीआई गठबंधन पर आरोप लगा रहल अछि जे ओ पिछड़ा केर आरक्षण मुसलमानमे बांटि रहल अछि। एम्हर विपक्षी गठबंधनक मुख्य नेता आ बिहारक पूर्व मुख्यमंत्री लालू प्रसाद यादव सेहो मुसलमानकेँ आरक्षण देबाक समर्थन कयलनि अछि। लालू प्रसाद यादवक एहि बयानक बाद आब आरक्षणक मुद्दा पर एक बेर फेर हंगामाक संभावना अछि।
बिहारक पूर्व मुख्यमंत्री आ राजद नेता लालू प्रसाद यादव दावा कयलनि जे वोट हमर पक्षमे अछि। ओ आरोप लगौलनि जे भाजपा जंगलराजक नाम पर लोककेँ भड़काबय केर कोशिश कऽ रहल अछि। लालू यादवसँ मुसलमानक आरक्षणक मुद्दा पर पूछताछ कएल गेल। एहि पर लालू कहलनि – “मुसलमानकेँ आरक्षण भेटबाक चाही, पूरा भेटबाक चाही।”
पटनामे लालू प्रसाद यादवसँ केन्द्रीय गृह मंत्री अमित शाहक एहि बयानक विषयमे पूछल गेल छल जे जँ इंडिया गठबन्धन सत्तामे आबि जायत तँ देशमे जंगलराज होयत। एहि पर राजद प्रमुख लालू प्रसाद यादव कहलनि जे ओ (गृह मंत्री अमित शाह) एतेक डरि गेल छथि जे ओ सबकेँ भड़का रहल छथि। लालू कहलनि जे ओ संविधान आ लोकतंत्रकेँ नष्ट करय चाहैत छथि, जनता इ बुझि गेल अछि।
निर्वाचन आयोग कहलक अछि जे लोकसभा चुनाव ७ चरणमे होयत। पहिल चरणक मतदान १९ अप्रैलकेँ आ सातम चरणक मतदान १ जूनकेँ होयत। बिहारमे ४० लोकसभा सीट पर चुनाव ७ चरणमे होएत – १९ अप्रैल, २६ अप्रैल, ७ मई, १३ मई, २० मई, २५ मई आ १ जून। परिणाम ४ जून के घोषित होएत।
