आगामी चुनाव अछि हमर अग्नि परीक्षा : अरविंद केजरीवाल

नई दिल्ली
*

दिल्लीक पूर्व मुख्यमंत्री अरविन्द केजरीवाल रविदिन कहलनि जे आगामी दिल्ली विधानसभा चुनाव कोनो छोट चुनाव नहिं अछि, ई चुनाव अरविन्द केजरीवालक लेल अग्नि परीक्षा अछि।
दिल्लीक जनताकेँ सम्बोधित करैत अरविंद केजरीवाल कहलनि जे जँ अहाँकेँ लगैत अछि जे अरविंद केजरीवाल ईमानदार छथि तखनि हमरासभकेँ वोट दियौक। मुदा जँ अहांकेँ लगैत अछि जे केजरीवाल बेईमान छथि तऽ हमरा वोट नहिं दिअ।

अपन ऊपर लागल आरोप पर अरविन्द केजरीवाल कहलनि, “नेतासभकेँ एहन आरोपसँ कोनो फर्क नहिं पड़ैत अछि, मुदा हम नेता नहिं छी, हमरा फर्क पड़ैत अछि। जखनि भाजपाक लोकसभ हमरा चोर, भ्रष्ट कहैत छथि, जखनि गारि दैत छथि तखनि हमरा फर्क पड़ैत अछि। हम आई बहूत दुखी छी। हमर आत्मा पीड़ित अछि। हम बहुत दुखी छी आ ताहि लेल हम इस्तीफा दऽ देलहुँ, हम अपन जीवनमे मात्र सम्मान, मात्र ईमानदारी अर्जित कयलहुँ अछि। हमरा लग कोनो पैसा नहिं अछि। आइ हमरा लग दिल्लीमे रहबाक लेल अपन एकटा घर पर्यंत नहिं अछि।”

अरविंद केजरीवाल कहलनि जे हमर सरकारक काज केर देखैत केंद्र सरकार केर लागल जे जँ ओ हुनकासँ जीतय चाहैत छथि तऽ हुनका बदनाम करी। एकरा लेल अरविंद केजरीवाल, मनीष सिसोदिया आ पूरा आम आदमी पार्टीकेँ बेईमान साबित करबाक षड्यंत्र रचल गेल छल। एकरा लेल हमरा जेलमे डालि देल गेल।हम जेलसँ बाहर आबि इस्तीफा दए देलहुँ। अहाँ जरूर सोचि रहल होयब जे जेलसँ बाहर अयलाक बाद हम इस्तीफा किएक देलहुँ। हम इस्तीफा एहि लेल दए देलहुं किएक तँ हम एतय ई सब करबाक लेल नहिं आयल छलहुँ। हम अईठाम भ्रष्टाचार करए लेल नहिं आयल छी। हमरा सत्ता वा मुख्यमंत्रीक कुर्सीक लोभ नहिं अछि। हम अईठाम पैसा कमाबए लेल नहिं आयल छलहुँ। हम देशक लेल, भारत माताक लेल, देशक राजनीति बदलबाक लेल आयल छलहुं।

अरविन्द केजरीवाल रविदिन जंतर-मंतर पर मंचसँ बजैत अपन चुनाव चिन्ह ‘झाड़ू’ देखौलनि। ओ कहलनि जे ई झाड़ू मात्र आम आदमी पार्टीक चुनाव चिन्ह नहिं अछि, बल्कि ई झाड़ू आस्थाक प्रतीक अछि। जखनि कोनो आदमी वोट देबय लेल जाइत अछि आ झाड़ूक बटन दबाबैत अछि तखनि ओ पहिने अपन आँखि बंद कऽ भगवानक नाम लैत अछि। जखनि ओ झाड़ूक बटन दबाबैत छथि तखन मनमे सोचैत छथि जे ओ ईमानदारीक बटन दबा रहल छथि। मतदाता चुनावक समय झाड़ू बटन दबाबैत सोचैत छथि जे हम एकटा ईमानदार सरकार बनेबाक लेल बटन दबा रहल छी।