केंद्रीय जल शक्ति राज्य मंत्री डॉ. राज भूषण चौधरी एहि बातकेँ रेखांकित कयलथि जे असमक विकासमे यूपी-बिहारक जनताक अहम भूमिका रहल अछि जे अपन खून-पसीनासँ असमकेँ सींचने छथि। ओ कहलनि जे हुनकर कर्म भूमि असमक प्रति हुकनर निष्ठा अतुलनीय अछि आ सब लोकनि सेहो अपन माटिसँ जुड़ल छथि। एहि लोकक विशेषता ई अछि जे असमिया संस्कृति आ समाजकेँ आत्मसात करैत अपन परंपरा आ संस्कृतिसँ सेहो जुड़ल रहैत छथि |
ओ कहला जे असमक एहि मेहनती लोककेँ देखला पर मॉरीशस मजदूरक याद अबैत छनि। ओ प्रवासी लोकनि अपन खून आ पसीनासँ मॉरीशसकेँ सींचने छथि। ओ कहला जे पटनामे असम भवन आ गुवाहाटीमे बिहार भवनक निर्माण लेल ओ अथक प्रयास करताह।
डॉ. चौधरी काल्हि गुवाहाटीक एकटा होटलमे हुनकर सम्मानमे आयोजित नागरिक अभिनंदन समारोहमे ई बात कहि रहल छलाह। एहि कार्यक्रमक आयोजन पूर्वोत्तर हिन्दी भाषी समाज द्वारा कएल गेल छल।
एहि अवसर पर संतोष जायसवाल, एसपी राय, विजय गुप्ता, रविशंकर रवि, शिवाजी जायसवाल, रत्न सिंह आ सुबोध सिंह सेहो अपन विचार रखलनि। कार्यक्रमक शुरुआत राम सरोवर सिंहक स्वागत भाषणसँ भेल। कार्यक्रमक संचालन श्रीनिवास झा आ धन्यवाद ज्ञापन प्रेम कांत चौधरी कयलनि।
एहि अवसर पर 14टा संस्था हुनका सम्मानित कयलक। एहिमे अखिल असम कलवार समाज, अखिल असम भोजपुरी परिषद, पूर्वोत्तर हिन्दुस्तानी सम्मेलन, पूर्वोत्तर प्रदेशीय मारवाड़ी युवा मंच, पूर्वोत्तर क्षेत्रीय महासभा, यादव समाज, मिथिला सांस्कृतिक समन्वय समिति, बिहार फाउंडेशनक असम चैप्टर , ब्राह्मण समाज, उत्तर प्रदेशीय पूर्वोत्तर विकास मंच, साधु मार्गी जैन श्रावक संघ, गुवाहाटी साहनी कांवड़िया (एनजीओ) आदि सहित जोरहाट आ नगांव कलवार समाज सेहो शामिल छलथि।
