केंद्र सरकारक कर्मचारी आ पेंशनधारककेँ सरकारसँ दिवालीक उपहार भेटय जा रहल अछि। केन्द्रीय मंत्रिमंडल बुधदिन भेल अपन बैसारमे महंगाई भत्ता आ महंगाई राहतमे ३ प्रतिशतक वृद्धिकेँ मंजूरी देलक अछि। एहि वृद्धिक बाद डीए मूल वेतनक ५० प्रतिशतसँ बढ़ि कऽ ५३ प्रतिशत भऽ गेल अछि।
केंद्र सरकारक एहि निर्णयसँ लाखो सरकारी कर्मचारीकेँ फायदा होएत। महंगाई भत्ताक गणना अखिल भारतीय उपभोक्ता मूल्य सूचकांकक आधार पर कयल जाइत अछि। डीए केर हर ६ महीनामे संशोधित कयल जाइत अछि। केंद्र सरकारक सेवानिवृत्त कर्मचारीकेँ महंगाई राहत देल जाइत अछि। डीए वृद्धिक बाद जनवरी आ जुलाईमे ई समायोजन प्रभावी भऽ जाइत अछि।
डीएक घोषणा मार्च आ सितम्बरमे कयल जाइत अछि। जनवरीमे डीए वृद्धि मार्च धरि चलैत अछि। तहिना जुलाईमे डीए बढ़यबाक घोषणा दिवाली धरि चलैत अछि। तीन प्रतिशत डीए वृद्धिक बाद एंट्री लेवलक सरकारी कर्मचारीक मूल वेतनमे मासिक आधार पर 540 रुपयाक बढ़ोत्तरी होबए केर संभावना अछि।
सरकारक एहि निर्णयसँ लगभग एक करोड़ केंद्रीय कर्मचारी आ पेंशनभोगीकेँ राहत भेटत। कर्मचारीसभकेँ जुलाई, अगस्त आ सितम्बरक बकाया सेहो भेटबाक आशा अछि। ९ अक्टूबरकेँ केन्द्रीय मंत्रिमंडलक बैसारक बाद डीएमे वृद्धिक अपेक्षा छल। मुदा, केन्द्रीय कर्मचारी आ पेंशनभोगीसभकेँ एहि संशोधनक लेल किछु बेसी प्रतीक्षा करय पड़लनि।
एकर अतिरिक्त छत्तीसगढ़क मुख्यमंत्री विष्णु देव साय बुधदिन घोषणा कयलनि जे दिवाली आ उत्सवक मौसमसँ पहिने राज्य सरकारक कर्मचारीक महंगाई भत्ता (डीए) मे ४ प्रतिशतक वृद्धि कयल जायत। एहि तरहेँ ई मूल वेतनक ५०% होयत। ई वृद्धि १ अक्टूबरसँ प्रभावी होयत।
