मधेपुरा सदर अस्पतालमे रविदिन रातिमे भर्ती कराओल गेल एकटा अज्ञात व्यक्तिक पहिचान मंगलदिन भर्राही थाना क्षेत्रक बेतौना वार्ड-14 निवासी सुरेन्द्र राम (60 वर्ष) केर रूपमे कयल गेल। परिवारक सदस्यक अनुसार सुरेंद्र राम मजदूरक काज कs अपन परिवारक भरण-पोषण करैत छलाह आ पिछला एक सप्ताहसँ मधेपुरा पूर्वी बाईपास रोड पर एकटा निर्माण स्थल पर काज कs रहल छलाह।
रविदिन सुरेन्द्र राम काजक लेल मधेपुरा एलाह मुदा घर नहि घुरलाह। जखनि परिवार हुनका मोबाइल पर संपर्क करबाक प्रयास केलक तs मोबाइल बंद भेटल। मंगलदिन भोरमे हुनका सबकेँ जानकारी भेटल जे एकटा अज्ञात शवकेँ सदर अस्पतालमे राखल गेल अछि, तकर बाद ओ सब अस्पताल पहुंचल आ शवक पहिचान सुरेंद्र रामक रूप कयलथि।
सदर अस्पताल प्रशासन केर अनुसार रविदिन साँझमे किछु लोक सुरेन्द्र रामकेँ अस्पतालक इमरजेंसी वार्डमे भर्ती करा कs चलि गेल। डाक्टर सब हुनकर इलाज शुरू कयलक मुदा किछुए समयमे हुनकर मृत्यु भs गेल। सदर थानाक दरोगा इंद्रजीत तांती अस्पताल पहुंचलाह, शवके कब्जामे लs कs पोस्टमार्टमके लेल पठा देलनि।सोमदिन शवक पहिचानक लेल सुरक्षित राखल गेल छल।
सुरेन्द्र राम हुनक परिवारक एकमात्र कमाएबला सदस्य छलाह । हुनका दू टा बेटा आ एकटा बेटी छनि, जाहिमे सँ एकटा बेटा पूर्ण रूपसँ विकलांग अछि। हुनक निधनसँ परिवार पर भारी आर्थिक संकट आबि गेल अछि।
मंगलदिन भोरमे भर्राही थानाक पुलिस हुनकर घर जा कs घटनाक बारेमे पूछताछ कयलक। सकरपुरा बेतौना पंचायतक मुखिया राजा राम कुमार सेहो परिवारसँ भेंट कs घटना केर निष्पक्ष जांच आ आश्रित परिवारके मुआवजाक माँग कयलनि।
