जल शक्ति मंत्रालयक कहब अछि जे देशक लगभग १६ करोड़ ग्रामीण घरमे आब पेयजलक पहुँच अछि। ‘जल जीवन मिशन’क प्रारम्भक समय मात्र १७ प्रतिशत ग्रामीण परिवारकेँ पेयजल भेटैत छल, जखन कि आब ई आंकड़ा ७८.५८ प्रतिशत अछि।
‘जल जीवन मिशन’क उद्देश्य प्रत्येक ग्रामीण घरकेँ पानिक नलक कनेक्शन प्रदान करब अछि। प्रधानमंत्री नरेन्द्र मोदी १५ अगस्त २०१९ केँ जल जीवन मिशनक शुरुआत कयलनि।
मंत्रालय कहलक जे ६ अक्टूबर धरि मिशनक अन्तर्गत १५.१९ करोड़ ग्रामीण परिवारकेँ पानिक नलक कनेक्शन भेटल अछि। मिशनक प्रारम्भक बादसँ ११.९५ करोड़ नव नलक पानिक कनेक्शन प्रदान कयल गेल अछि।
गोवा, हरियाणा, तेलंगाना आ हिमाचल प्रदेश सन राज्यमे १०० प्रतिशत ग्रामीण घरमे सुरक्षित पेयजलक पहुँच अछि। एकर अतिरिक्त, देश भरिमे ९.२९ लाखसँ बेसी विद्यालय आ आंगनवाड़ी केन्द्रमे स्वच्छ पानि पहुँचि रहल अछि।
मंत्रालयक अनुसार, फील्ड टेस्ट किटक उपयोगसँ २४ लाखसँ बेसी महिलाकेँ पानिक गुणवत्ताक जाँच करबाक लेल प्रशिक्षित कयल गेल अछि।एखनि धरि ५४ लाखसँ बेसी पानिक नमूनाक जाँच कयल जा चुकल अछि।
एहि पहलक उद्देश्य ग्रामीण-शहरी क्षेत्रक बीच जल आपूर्तिक अन्तरकेँ कम करब आ सार्वजनिक स्वास्थ्यकेँ बढ़ावा देनाइ अछि।
‘जल जीवन मिशन’ ग्रामीण महिलासभकेँ घरक लेल पानि आनयसँ मुक्तिक लेल, हुनक स्वास्थ्य, शिक्षा आ सामाजिक-आर्थिक स्थितिमे सुधार करबाक प्रयास अछि। ई मिशन ग्रामीण परिवारक लेल जीवनकेँ आसान बनेबाक संग गौरव आ सम्मानक प्रतीक अछि।
‘जल जीवन मिशन’ सुरक्षित पेयजलक प्रति जागरूकता बढ़यबाक आ पानिकेँ सबहक जिम्मेदारी बनयबाक प्रयास अछि।
