राजदक एकटा महत्वपूर्ण बैठकमे मंगलकेँ सदस्यता अभियानक समीक्षा कयल गेल। संगहि संस्थाकेँ कोना मजबूत बनाओल जाय ताहि पर चर्चा भेल।
तेजस्वी यादवक अध्यक्षतामे मंगलकेँ राजद कार्यालयमे बैसार भेल। एहि बैसारमे सदस्यता अभियानक समीक्षा भेल। वर्तमान राजनीतिक स्थिति, २०२५क विधानसभा चुनावक रणनीति पर सेहो चर्चा कयल गेल। बैसारमे सांसद, विधायक, विधान परिषद सदस्य, प्रमुख नेता, राज्य समितिक सदस्य, जिला अध्यक्ष आ पूर्व विधायक उपस्थित छलाह।
बैसारक बाद लोकसभामे राजद संसदीय दलक नेता अभय कुशवाहासँ पूछल गेल जे की नीतीश-तेजस्वी फेरसँ एक संग आबि सकैत छथि। एहि पर ओ एकटा पैघ बयान दैत कहलनि जे “चाचा आ भतीजा एखनौंह एक संग छथि। हुनकर काका मुख्यमंत्री छथि आ भतीजा प्रतिपक्षक नेता छथि। अहाँ केना कहि सकैत छी जे काका आ भतीजा एक संग नहि छथि ? देखू राजनीतिक अगिला दौरमे की होइत अछि। अटकलबाजीक बाजार जारी अछि। अहां देखैत जाउ, हम सेहो देखैत छी।
अभय कुशवाहा आगू कहलनि जे बैसारमे सदस्यता अभियानक समीक्षा कयल गेल। संस्थाकेँ कोना मजबूत बनाओल जाय एहि पर सेहो चर्चा भेल अछि। २०२५क विधानसभा चुनावक रणनीति पर चर्चा भेल। ओ कहलनि जे भाजपा जुमला पसारैत अछि, एकरा केना काटल जाए। एहि पर सेहो चर्चा भेल। कोन निर्वाचन क्षेत्रमे हम कमजोर रहल छी आ ओतय अपन सुधार कोना करब, एहि पर सेहो चर्चा भेल।
मुख्य प्रवक्ता शक्ति यादव बैसारकेँ महत्वपूर्ण बतौलनि।
बैसारसँ पूर्व एकटा न्यूजक चैनल केर संग बातचीतमे कहलनि जे ई बैसार महत्वपूर्ण अछि किएक तँ ई एहेन समयमे भऽ रहल अछि जखनि बिहारक राजनीतिमे उथल-पुथलक संकेत भेटि रहल अछि। भाजपा आ जेडीयूक बीच संबंधमे तनावक खबरि सेहो राजनीतिक हलकामे जोर पकड़ि रहल अछि। नीतीशक चुप्पी केर कारण अटकलबाजीक बाजार गर्म अछि। बैसारमे मनोज झा, सांसद सुरेन्द्र यादव, सांसद सुधाकर सिंह, सांसद अभय कुशवाहा, पूर्व केन्द्रीय मंत्री जेपी यादव, वरिष्ठ नेता भोला यादव सहित कतेको प्रमुख नेता उपस्थित छलाह।
