बुद्ध स्मृति पार्क संग्रहालय, पटना केर सभागारमे शनि दिन आयोजित इंटैक पटना चैप्टरक वार्षिक बैसारमे कन्वेनर भैरव लाल दास जी द्वारा यूआर एंड डीसीकेँ प्रमुख डॉ. विनय कर्णक अभिनन्दन कएल गेलन्हि।
इंटैक पटना चैप्टरक सह संयोजक एवं संग्रहालयक पूर्व निदेशक डॉ. उमेश चन्द्र द्विवेदी, बुद्ध स्मृति पार्क संग्रहालयक अध्यक्ष एवं पुराविद डॉ. शिव कुमार मिश्र, प्रख्यात समाज सेवी कमल नयन श्रीवास्तव, डॉ. निगम प्रकाश नारायण, के. के. अग्रवाल, प्रो. अजय प्रताप, ई. दीपक कुमार बक्शी, प्रो. नीतू तिवारी, डॉ. मनीष कुमार आदिक गरिमामयी उपस्थितिमे इंटैक पटना चैप्टर केर वरिष्ठ सदस्य राय यशेन्द्र प्रसाद एवं कुमार राघवेन्द्र सिंह द्वारा डॉ. विनय कर्णकें मेम्बरशिप कार्ड प्रदान क’ कs हुनक संस्थाकें इंटैक परिवारमे शामिल कएल गेल।
ज्ञातव्य अछि जे ‘यू आर एंड डी सी'(उग्राद्या रिसर्च एंड डेवलपमेंट सेंटर), पटना ‘इंडियन नेशनल ट्रस्ट फॉर आर्ट एंड कल्चरल हेरिटेज — इंटैक’ केर बिहारक पहिल आ एकमात्र इंस्टिट्यूशनल मेंबर अछि।
अपन संस्थाक परिचय प्रस्तुत करैत डॉ. विनय कर्ण कहलन्हि जे गरीब विद्यार्थी एवं बेरोजगार सभक निःशुल्क सहायताक लेल हुनक संस्था सदैव तत्पर रहल अछि। केंद्रीय,राज्य स्तरीय सरकारी वा गैर सरकारी नौकरीक तैयारी केनिहार ग्रामीण युवा सभक सब तरहें मदतिक लेल उग्राद्या एवं एकर सब सहयोगी संस्था सदैव प्रयत्नशील रहैत अछि। हर्ष व्यक्त करैत डॉ. कर्ण कहलन्हि जे हुनक संस्था कतोक बरखसँ कला एवं संस्कृति, विलुप्त होइत कलाकेँ कलाकार सभक संरक्षणमे संलग्न अछि आओर आब इंटैक केर संग जुड़ि कए एहि दिशामे बेसी सक्रिय भूमिकाक निर्वहन करबाक अवसर भेटतै। एहि लेल ओ इंटैक परिवारकेँ धन्यवाद देलखिन।
इंटैक पटना चैप्टर द्वारा आयोजित विभिन्न प्रतियोगिता सभक विजेता सभकेँ सेहो एहि समारोहमे सम्मानित कएल गेलैन्ह। एहि अवसर पर योर हेरिटेज केर रचना प्रियदर्शिनी, मिथिला पेंटिंग केर विख्यात कलाकार अलका दास, स्प्रिहा सिंह, करुणा तिवारी, सुमित सौरभ, आनन्द कुमार शर्मा, अर्चना चौधरी, अंजलि कुमारी, राहुल कुमार दास अम्बुज, रजनी कुमारी, अभिजीत वर्मा आदि अनेक गोटे उपस्थित छलथि।
