बिहारक सारण जिलामे विवादित झण्डा लहरयबाक वीडियो सोशल मीडिया पर वायरल भेलाक बाद दूटा युवककेँ हिरासतमे लेल गेल।
ई वीडियो सोमदिन कोपा थाना अन्तर्गत कोपा बाजारमे मिलाद-उल-नबीक जुलूसक दौरान शूट कयल गेल। पुलिस अधीक्षक कुमार आशीषक निर्देशक अनुसार जांच कयल जा रहल अछि आ कोपा थानामे संबंधित धाराक तहत एफआईआर दर्ज कए आगूक कारवाईक प्रक्रिया चलायल जा रहल अछि। दुनू युवकसँ पूछताछ चलि रहल अछि।
पुलिस कहलक जे महोत्सवक अवसर पर जिलामे विवादित झण्डा लहरायल जयबाक एकटा वीडियो वायरल भेल छल। जाँचक दौरान पता चलल जे ई वायरल वीडियो कोपा थाना क्षेत्रक अछि। एहि मामिलामे पुलिस कारवाई करैत दूटा लोककेँ हिरासत मे लेलक।
सारण पुलिसक अनुसार, “सोशल मीडियाक माध्यमसँ एकटा वीडियो प्राप्त भेल अछि जाहिमे ध्वजक विवादित प्रतीक छल। ई भारतक ध्वज संहिता, २००२ सहित कतेको अधिनियमक स्पष्ट उल्लंघन अछि।”
पुलिस विवादित झण्डा जब्त कऽ लेलक अछि आ पूरा मामिलाक जाँच कऽ रहल अछि। पुलिसक दावा अछि जे एहिमे सम्मिलित व्यक्तिक विरुद्ध कठोर कार्रवाई कयल जायत। पुलिस आम लोकसँ अपील कयलक अछि जे ओ अफवाह पर ध्यान नहिं देथि आ पुलिस-प्रशासनकेँ सहयोग करथि। अफवाह पसारयवालाक खिलाफ सख्त कारवाई कएल जाएत।
