अमेरिकी राष्ट्रपति डोनाल्ड ट्रंप रूस-यूक्रेन युद्ध पर एकटा अटपटा बयान देलनि अछि। ओ कहलनि कि भरिसक ई निक होयत जे दुनू देश किछु समय धरि लड़ैत रहए। दोसर दिसि, जर्मन चांसलर फ्रेडरिक मर्ज अमेरिकासँ रूस पर दबाव बढ़ेबाक अपील कयलनि अछि।
व्हाइट हाउसमे मर्ज संग भेंटक दौरान ट्रंप कहलनि, “हुनका सभक बीच गहिंर नफरत आ बदलाक भावना अछि, एहेनमे निकट भविष्यमे युद्धविरामक उम्मीद करब मुश्किल अछि। ओ सभ लगातार लड़ि रहल छथि। जेना खेलमे रेफरी कनी काल धरि खेलाड़ीकेँ भिड़य दैत अछि, तहिना कखनो-कखनो हुनका थोड़े समय धरि लड़य देब ठीक होइत अछि।”
जनतब जे ई टिप्णी ट्रंपक ओहि दावामे एकटा पैघ बदलाव अछि, जाहिमे ओ कहने रहथि जे ओ सत्तामे अओताह तऽ युद्ध जल्दी खत्म करबा देताह।
जर्मन चांसलर मर्ज ट्रंपसँ आग्रह कयलनिन जे अमेरिकाकेँ युद्ध खत्म कराबयमे निर्णायक भूमिका निभाबय केर चाही आ रूस पर आओर दबाव बनाबय केर चाही। ओ कहलनि, “अमेरिका ई युद्ध समाप्त करेबाक स्थितिमे अछि। हम चाहैत छी जे अमेरिका रूस पर अधिक दबाव बनाबय।”
नव प्रतिबंध पर पूछल गेल सवाल पर ट्रंप संकेत देलनि जे फिलहाल तुरंत कोनो फैसला नहि लेल गेल अछि, मुदा ओ इहो कहलनि जे जँ हालात नहि सुधारल, तऽ हम दुनू देश पर कड़ा कारवाई करब। कारणकि एकटा कहावत अछि जे – थपुड़ी दूनू हाथसँ बाजैत अछि।
एकर संगहि, ट्रंप रूसी राष्ट्रपति व्लादिमीर पुतिनकेँ चेतौनी दैत कहलनि, “जँ हम नहि रहितहुँ, तऽ रूस संग बहुत खराब भ’ गेल रहैत, हमर मतलब अछि बहुत खराब। पुतिन आगिसँ खेलि रहल छथि।” ई बात ट्रंप अपन सोशल मीडिया साइट ट्रुथ सोशल पर लिखलनि।
ओ पुतिन आ यूक्रेनक राष्ट्रपति वोलोदिमीर ज़ेलेंस्की दुनू पर तीक्षण टिप्पणी करैत कहलनि, “हम पुतिनक हरकतसँ खुश नहि छी। नहि जानि जे पुतिनकेँ की भऽ गेल अछि।”
