अमेरिकी राष्ट्रपति डोनाल्ड ट्रंप भारत आ पाकिस्तानक बीच चलि रहल तनावमे अमेरिकाकेँ भूमिकासँ इनकार कएलनि। ई बयान पहलगाम आतंकी हमलाक बाद आएल अछि। ट्रंप कहलनि जे दूनू देश ई मसलाकेँ “कोनो ने कोनो तरहें सुलझा लेत।”
ट्रंप पहिने अपन कार्यकालमे भारत आ पाकिस्तानक बीच मध्यस्थताक प्रस्ताव देलनि, लेकिन शुक्रदिन जखनि रोम जेबाक समय हुनका पत्रकार पुछलक जे की ओ एहि मुद्दा पर चिंतित छथि आ की ओ दूनू देशक नेता संग बात करताह, तँ ओ एही बेर मध्यस्थताक प्रस्ताव नहि देलनि। रोममे ओ पोप फ्रांसिसक अंतिम संस्कारमे भाग लेबय जा रहल छलथि।
ट्रंप मजाकिया शैलीमे कहलनि जे भारत-पाकिस्तान सीमाक तनाव “1500 सालसँ चलि रहल अछि।” हालाँकि, ई ऐतिहासिक रूपसँ अतिशयोक्ति अछि। ओ कहलनि, “हमरा विश्वास अछि जे दुनू नेता एकरा सुलझा लेताह। हम दुनूकेँ जानैत छी।”
भारत सदिखन अपन सीमा विवादमे बाहरी मध्यस्थताक खिलाफ रहल अछि, चाहे ओ पाकिस्तान संग होय वा चीन संग। दोसर दिसि, पाकिस्तान कतेको बेर मध्यस्थताक माँग कए चुकल अछि। हालाँकि, ई स्पष्ट नहिं अछि जे एहि बेर पाकिस्तानक कोनो हस्तक्षेपक माँग अछि वा नहि। ट्रंपक पहिल पेशकश तत्कालीन पाकिस्तानी प्रधानमंत्री इमरान खानक सार्वजनिक अनुरोधक बाद भेल छल, मुदा भारत एकरा ठुकरा देलक।
ट्रंप अपन दोसर कार्यकालमे सेहो भारत-चीन सीमा विवादमे मध्यस्थताक प्रस्ताव रखलनि, तखनि सेहो भारत एहि प्रस्तावकेँ अस्वीकार कऽ देलक। एहि बेर ट्रंप मध्यस्थताक कोनो इच्छा नहि देखयलनि, मुदा ओ आ हुनक अधिकारी सब पहलगाम आतंकवादी हमला केर कड़ा निंदा कयलनि आ भारतक आतंकवादक खिलाफ लड़ाईमे समर्थनक प्रस्ताव देलनि। हमलाक किछु घंटा बाद ट्रंप प्रधानमंत्री मोदीकेँ फोन कऽ संवेदना आ समर्थन व्यक्त कयलनि। व्हाइट हाउस सेहो तुरंते एहि हमला पर बयान जारी कएलक। अमेरिकाक राष्ट्रीय खुफिया निदेशक तुलसी गबार्ड सेहो शुक्रकेँ अपन संवेदना व्यक्त कयलनि। ओ एक्स पर लिखलनि, “हम एहि जघन्य हमलाक लेल जिम्मेदार लोककेँ पकड़यमे अपन समर्थन करैत छी।”
