जिलाक फतुहा थाना क्षेत्रमे पटना-बख्तियारपुर फोर लेन पर शुक्रदिन एकटा दर्दनाक सड़क दुर्घटनामे कटिहारक राजद नेता आओर मुखिया संघ केर अध्यक्ष कौशल किशोर यादवक मौका पर मृत्यु भs गेल, फतुहा- खुशरूपुर सीमा केर समीप एकटा ट्रक आ बोलेरोके बीच भयंकर टक्कर केर कारण दुर्घटना भेल अछि।
एहि दुर्घटनामे बोलेरोमे सफर करय वाला चारिटा आओर लोक गंभीर रूपसँ घायल भs गेल छथि, जेकरा प्राथमिक चिकित्साक बाद पटनाक अस्पतालमे रेफर कs देल गेल अछि। प्राप्त जानतबक अनुसार कौशल किशोर यादव जे रौनिया पंचायतक मुखिया छलाह आ राजद पंचायती राज प्रकोष्ठक अध्यक्ष सेहो छलाह, पटना केर बापूसभागार भवनमे आयोजित बैसारमे भाग लेबय लेल अपन बोलेरो कारमे कटिहारसँ पटना जा रहल छलाह. एहि दौरान हुनकर बोलेरो कार फतुहा लग तेज रफ्तार ट्रकसँ आमने-सामने टकरा गेल।
दुर्घटनाक समय कौशल किशोर यादवक संग बोलेरोमे चारि अन्य लोक सफर कs रहल छल। दुर्घटनामे मृत मुखिया संघक अध्यक्ष आ राजद नेता राकेश कुमार सहित घायल भेल लोकमे गाड़ीके चालक, विमल कुमार आ भगवान कुमार यादवक बेटा बंटी कुमार शामिल छथि। फतुहा अस्पतालमे प्राथमिक चिकित्साक बाद सब गोटेकेँ पटना रेफर कs देल गेल अछि, जतय हुनकर हालत गंभीर बनल अछि।
दुर्घटना ततेक भयावह छल जे आवाज सुनला पर नजदीक केर लोक ओहि ठाम जमा भs गेल आ किछु समय तक पटना-बख्तियारपुर फोर लेन पर जाम लागल छल। सूचना भेटला पर फतुहा पुलिस मौका पर पहुंचल आ शवकेँ कब्जामे लs कs पोस्टमार्टमक लेल पठा देलक। बताओल जा रहल अछि जे कौशल किशोर यादवक संग किछु आओर लोक सेहो एकटा आओर स्कॉर्पियो कारमे सफर कs रहल छलाह, जे पाछु छलाह। दुर्घटना केर जानकारी भेटला पर ओ सब मौका पर पहुंचि स्थितिक बारेमे जानकारी लेलनि।
