पूर्णियामे एकटा महिला डॉक्टर यातायात पुलिसपर अपन स्कूटीक जाँचक बहन्ने दुर्व्यवहारक आरोप लगओलनि अछि। हुनकर दावा छनि जे पुलिस पहिने हुनकर डिक्की आ पर्सक जाँच कयलक, फेर कहलक जे चूँकि हुनका लग हेलमेट नहि छल, तेँ हुनका जुर्माना देबय पड़तनि।
सरकारी मेडिकल कॉलेज अस्पतालमे काज करय वाली डॉ. रंजना कुमारी कहलनि जे हर दिन जकाँ ओ मंगलदिन अपन स्कूटीसँ अस्पताल जा रहल छलीह। एहि दौरान पुलिस हुनका पूर्णियाक लाइन बाजार चौक पर स्थित यातायात चौकी लग रुकबाक संकेत देलक। जखनि ओ अपन स्कूटी रोकलनि तखनि यातायात पुलिस कहलक जे हुनका हुनकर पर्स आ डिक्कीक जाँच करबाक आवश्यकता अछि। जखनि ओ पुछलखिन जे ओ सभ की जाँच कऽ रहल छथि तखनि एकटा पुलिस अधिकारी जकर मुँहमे पान छल, घमण्डसँ जवाब देलनि जे ई जाँचक लेल अछि। ओतय कोनो महिला अधिकारी उपस्थित नै छल, ओ ओकर पर्स आ स्कूटरक डिक्की चेक कयलनि।
महिला चिकित्सकक कहब छनि जे पुलिस भीड़-भड़ल गाड़ीसभमेसँ मात्र हुनका निशाना बनओलक आ भीड़मे मात्र हुनका जाँचक लेल बजौलक। जाँचक बाद एकटा पुलिसकर्मी हुनकर फोटो लेलक आ कहलक जे हुनका लग हेलमेट नहि अछि। ओ जवाब देलनि जे हेलमेट नहि होयब बुझबामे आबि सकैत अछि आ ओ एकर जुर्माना देबाक लेल तैयार छथि, मुदा हुनका पहिनेसँ सूचित कऽ देबाक चाही। आखिरकार, हुनकर पर्स आ डिक्कीके जाँच करए केर की मतलब छल ?
महिला चिकित्सक प्रश्न कयलनि जे सामान्यतः जखनि वाहनक जाँच कयल जा रहल होयत अछि तँ दूरसँ बुझल जाइत अछि जे आगू जाँच होइत अछि। मुदा, ओतए ओहेन किछु नहि छल। सभ गाड़ी आबि रहल छल आ जा रहल छल। ओ कहलनि जे जँ जाँच चलि रहल छल तखनि ओतय कोनो महिला पुलिस अधिकारी किएक तैनात नहि छल। कोनो पुलिस अधिकारी कोनो महिलासँ पर्स चेक कए सकैत अछि की ?
ड्यूटी पर तैनात यातायात पुलिस एसआई शंकर सिंह एहेन कोनो जाँचसँ इनकार कयलनि अछि। पूछला पर ओ कहलनि जे ओ स्कूटी पर सवार कोनो महिलाक पर्स आ डिक्कीक जाँच नहि कयलनि। ई पूर्णतः झूठ आरोप अछि। ई जाँच जरूर कोनो आन पुलिस द्वारा कयल गेल होयत। एतय लाइन बाजार चौक पर एहेन कोनो कारवाई नहि भेल अछि।
जखन ट्रैफिक थानाध्यक्ष रोशन कुमार सिंहकेँ पूछल गेल जे की यातायात पुलिस बाइक या वाहनक डिक्कीक जाँच कऽ सकैत अछि, तँ ओ कहलनि जे ओ बिल्कुल कऽ सकैत छथि। जखनि एकटा महिला डॉक्टरक स्कूटीक डिक्कीक सङ्ग ओकर पर्सक जाँच कयल जयबाक विषयमे पूछल गेल तँ ओ कहलनि जे पर्सक जाँच करबाक आरोप गलत अछि। संगहि महिलाक विशेष जाँचक लेल महिला पुलिस अधिकारीक उपस्थित रहब अनिवार्य रहैत अछि। महिला चिकित्सकक एहि प्रश्नक जबाबमे जे हुनका वाहनक भीड़सँ किएक रोकल गेल, थानाध्यक्ष बतौलनि जे एहेन नहि अछि, हेलमेट नहि पहिरबाक कारण हुनका रोकल गेल होयत। हेलमेट जाञ्चक क्रममे यातायात विभाग द्वारा देल गेल मशीनक उपयोगसँ जुर्माना लगाओल जाइत अछि, आ जुर्मानाक भुगतान यूपीआईक माध्यमसँ नकद वा ऑनलाइन कयल जा सकैत अछि।
