सी एम साइंस कालेजमे बीसीए सत्र : 2024-27 मे नामांकित छात्र सभ लेल इन्डक्शन क्लास भेल आयोजित
इन्डक्शन क्लास यानी दीक्षारम्भ कक्षाक उद्देश्य पाठ्यक्रममे शामिल नव छात्रकेँ नव शैक्षणिक वातावरण अनुकूल समायोजित करब आ आरामदेह महसूस करबामे मदति पहुंँचायब होइत अछि। ई हुनका शिक्षण संस्थान केर लोकाचार आ संस्कृतिकें विकसित करबाक संगहि अन्य छात्र आ शिक्षक लोकनिक संग परस्पर संबंध बनेबामे मार्गदर्शन करैत अछि। ई बात शुक्रदिन सीएम साइंस कालेजमे तीन वर्षीय बैचलर ऑफ कंप्यूटर एप्लीकेशन (बीसीए) सत्र: 2024-27 केर छात्र लेल आयोजित इन्डक्शन क्लासमे पाठ्यक्रम संयोजक डा अभिषेक शेखर कहलनि। ओ सीबीसीएस केर तहत निर्धारित बीसीए पाठ्यक्रम केर स्वरूप आ एकरा पूरा कयलाक बाद कैरियर संवारबाक भेटय बला अवसर केर विस्तृत जानकारी दैत कहलनि जे ई कार्यक्रम हुनका पैघ उद्देश्य आ आत्म-अन्वेषण केर भावनाकेँ उजागर करबामे सेहो मदतिगार होयत।
कार्यक्रमक अध्यक्षता करैत महाविद्यालयक प्रधानाचार्य प्रो दिलीप कुमार चौधरी कहलनि जे एहि कार्यक्रमक आयोजन छात्र-छात्रामे पढ़ौनी केर प्रति जागरूकता अनबाक संगहि हुनक स्वर्णिम भविष्य लेल अनुभवी मार्गदर्शन प्रदान करबाक उद्देश्यसँ कयल गेल अछि। अपन संबोधनमे प्रधानाचार्य महाविद्यालयक विभिन्न क्रिया-कलाप आ उपलब्धि केर विस्तृत जानकारी देलनि। बीसीए केर नव सत्रमे नामांकित छात्र-छात्राक अभिनंदन करैत ओ कहलनि जे आबय बला तीन साल हिनका सभ लेल स्वर्णिम होयत। जखन ओ समाजमे विषयगत सम्मान हासिल करताह।
कार्यक्रममे उपस्थित विभिन्न विषयक शिक्षक उपस्थित छात्रकें अपन-अपन विषयसँ संदर्भित जानकारी दैत सफल होयबा लेल सभकें कठिन परिश्रम करबाक मूल मंत्र देलनि। ओ सभ कहलनि जे कार्यक्रमक मुख्य उद्देश्य नव छात्र-छात्राकें नव परिवेशसँ परिचित करायब अछि। जाहिसँ छात्र-छात्राकें ई जानकारी भेटि सकय जे कोना ओ अपन कैरियरकें संवारैत देश, प्रदेश, समाज आ मानवता केर सेवा करैत अपन परिवारक नाम रोशन कऽ सकैत छथि।
कार्यक्रममे रसायन शास्त्रक शिक्षक डा विश्व दीपक त्रिपाठी, भौतिकीक शिक्षक डा अजय कुमार ठाकुर, अंग्रेजी केर शिक्षक डा युगेश्वर साह, कंप्यूटर साइंस केर शिक्षक डा रंजन कुमार ठाकुर, आइक्यूएसी सहायक प्रवीण कुमार झा आ पाठ्यक्रम सहायक अभिषेक कुमार आदि केर उल्लेखनीय उपस्थिति रहलनि।
