जम्मू-कश्मीरक लिडवा इलाकामे सोमदिन सुरक्षा बल ‘ऑपरेशन महादेव’ केर तहत तीन आतंकीकेँ मारि देलक। ई मुठभेड़ लिडवासमे भेल, जतय सेना आतंकीकेँ घेरने छल आ ओकरा सभकेँ ढ़ेर कऽ देलक।
ऑपरेशनक संबंधमे सेनाक चिनार कॉर्प्स केर कहब अछि जे ऑपरेशन महादेव लिडवास इलाकामे आतंकीसँ मुकाबला कयलक आ मुठभेड़क दौरान तीन आतंकीक मौत भऽ गेल अछि आओर ई अभियान एखनि जारी अछि।
एहेन कहल जा रहल अछि जे पहलगाम आतंकी हमलाक मास्टरमाइंड सुलेमान शाह सोमदिन श्रीनगरमे भेल मुठभेड़मे मारल गेल जाहिमे तीन आतंकी शामिल अछि। ऑपरेशन महादेव नामक ई संयुक्त अभियान भारतीय सेना आ जम्मू-कश्मीर पुलिस द्वारा दाचीगाम राष्ट्रीय उद्यान लग, दारा केर लग, बीहड़ लिडवास इलाकामे कयल गेल।
सूत्रक अनुसार जंगलमे सेना द्वारा किछु संदिग्ध आवाजकेँ इंटरसेप्ट कयल गेल। वायरलेस मैसेजक बाद सेना एहि इलाकामे अभियान चला देलक, जाहिमे मूसा सहित तीन आतंकी मारल गेल। मारल गेल आतंकी लगसँ एकटा एम 4 कार्बाइन असॉल्ट राइफल आ दूटा एके सीरीज राइफल बरामद कयल गेल अछि। सुरक्षा एजेंसी पहलगाम हमलासँ जुड़ल आर कनेक्शन सभक पता लगाबयमे जुटल अछि।
सुरक्षा एजेंसी सभ इहो जांच कय रहल अछि जे एहि आतंकीक नेटवर्क कतेक दूर तक पसरल छल। ओ सब ई पता लगाबय केर कोशिशमे छथि जे आतंकीकेँ हथियार आओर गोला-बारूद कतयसँ भेटि रहल छल। सूत्रक अनुसार किछु दिन पहिने हारवन इलाकामे संदिग्ध कम्युनिकेशन सिग्नल भेटल छल। जांचमे पता चलल जे आतंकीक संग भेटल डिवाइस पहलगाममे मारल गेल आतंकीक लगसँ भेटल डिवाइससँ मिलैत जुलैत अछि। जनतब देब जे समाचार सम्प्रेषण धरि खोज अभियान जारी छल।
