पश्चिम बंगालक राजधानी कोलकाताक कस्बा इलाकामे लॉ केर छात्राक संग कथित सामूहिक बलात्कारक मामिला सामने आबि गेल अछि। एहि मामिलामे तीन गोटेकेँ गिरफ्तार कयल गेल अछि।
कथित तौर पर बुधदिन साँझमे घटना भेल। गिरफ्तार तीनूमे सँ दू गोटे वर्तमान छात्र आ तेसर पूर्व छात्र अछि। आरोपीक वकील आजम खान कहलनि जे, सामूहिक बलात्कारक आरोप अछि। महिला आरोप लगौने अछि जे कॉलेज परिसरमे ओकरा संग बलात्कार भेल। कोर्ट पुलिसकेँ मंगल दिन 1 जुलाई धरि हिरासत देलक अछि।
पीड़िताक शिकायतक बाद कस्बा थाना प्राथमिकी दर्ज कय जांच शुरू कय देलक। सूत्रक अनुसार आरोपीमे 31 वर्षीय मोनोजित मिश्र (कॉलेजक पूर्व यूनिट अध्यक्ष), 19 वर्षीय जैब अहमद आ 20 वर्षीय प्रमित मुखर्जी (प्रमित मुखोपाध्याय) शामिल अछि।
26 जूनक साँझ कोलकाताक तालबगान क्रासिंग लग सिद्धार्थ शंकर शिशु राय उद्यानक सामने दू टा आरोपी मोनोजित आ अहमदकेँ गिरफ्तार कयल गेल। गिरफ्तारीक समय मोबाइल फोन जब्त कयल गेल। तेसर आरोपी प्रमितकेँ 27 जूनक भोर 12.30 बजे घरसँ गिरफ्तार कयल गेल छल आ मोबाइल फोन सेहो जब्त कयल गेल।
शुक्रदिन पुलिस कहलक जे कोलकातामे एकटा कॉलेज छात्राक संग ओकर दूटा सीनियर छात्र आ शैक्षणिक संस्थानक एकटा पूर्व छात्र द्वारा कथित तौर पर बलात्कार कयल गेल। एक अधिकारी कहलनि जे, तीनू आरोपीकेँ बृहस्पतिक राति गिरफ्तार कयल गेल। घटना 25 जूनक साँझमे भेल छल, जखनि छात्रा कॉलेज गेल छल आ तीनू आरोपी ओकरा शैक्षणिक संस्थानक भीतर सामूहिक बलात्कार कयलक। छात्र कस्बा थानामे शिकायत दर्ज करौलनि आ बृहस्पतिकेँ तीनू आरोपीकेँ हिरासतमे लेल गेल। फिलहाल मामिला प्रारंभिक अवस्थामे अछि। छात्राक मेडिकल परीक्षण चलि रहल अछि। शुक्रदिन आरोपीकेँ कोर्टमे पेश कैल जाएत।
भाजपाक अमित मालवीय एहि अपराधकेँ लऽ कऽ बंगालक मुख्यमंत्री ममता बनर्जी आओर हुनकर सत्ताधारी तृणमूल कांग्रेसकेँ निशाना बना ओ ‘एक्स’ पर बंगाली न्यूज रिपोर्टक लिखल शेयर कयलनि आ लिखलनि, ‘भयानक! 25 जूनकेँ कोलकाताक उपनगर कस्बाक लॉ कॉलेजक अंदर एकटा महिला कानूनक छात्राक संग सामूहिक बलात्कार भेल छल। आरोपी दोसर कियो नहि छल, एकटा पूर्व छात्र आ कॉलेजक दू गोटे छल।’
संगहि ओ कहलनि जे, एहिमे एकटा तृणमूल सदस्य शामिल अछि मुदा भाजपा नेता एहि दावाक लेल कोनो तथ्य वा सबूत नहि देलनि।
