केन्द्रीय वित्त मंत्री निर्मला सीतारमण आइ मोदी सरकारक तेसर कार्यकालक पहिल बजट प्रस्तुत कयलनि। बजटमे कयल गेल प्रावधान पर प्रसन्नता व्यक्त करैत प्रधानमंत्री कहलनि जे ई बजट देशकेँ समृद्धि दिस अग्रसर करत, आ एहि बजटमे समाजक सभ वर्गक ध्यान राखल गेल अछि। “ई शक्ति देबए बला बजट अछि। ई एकटा एहन बजट अछि जे किसान आ युवाकेँ प्रगतिक पथ पर लऽ जायत। पछिला १० सालमे २५ करोड़ लोक गरीबीसँ बाहर आयल अछि। ई हुनकर आर्थिक प्रगतिमे निरंतरताक बजट अछि। ई एकटा एहन बजट अछि जे युवासभकेँ अनगिनत अवसर दैत अछि। ई बजट मध्यम वर्गकेँ नव शक्ति देत। ई आदिवासी समाज, दलित आ पिछड़ाकेँ सशक्त बनयबाक लेल मजबूत योजना बनौने अछि। ई बजट महिलासभक आर्थिक भागीदारी सुनिश्चित करबामे सहायता करत।”
एहिसँ आर्थिक विकासमे तेजी आओत आ गति बनल रहत। रोजगार आ स्वरोजगार सृजन हमर सरकारक पहचान रहल अछि। आजुक बजट एकरा आओर मजबूत करैत अछि।”
प्रधानमंत्रीक अनुसार, “एहि बजटमे सरकार रोजगार संबद्ध प्रोत्साहनक घोषणा कयलक अछि। एहि योजनाक तहत हमर सरकार ओहि युवाकेँ पहिल वेतन देत, जकरा जीवनमे पहिल नौकरी भेटत। चाहे कौशल विकास आ उच्च शिक्षाक मदद हो वा फेर एक करोड़ युवाकेँ इंटर्नशिपक योजना, ई देशक शीर्ष कंपनीमे युवा, गरीब, हमर बेटा-बेटीकेँ लेल होएत। संभावनाक नव द्वार हुनका लेल खुजि जाएत।”
प्रधानमंत्री क अनुसार “हम हर शहर, हर गाम, हर घरमे उद्यमी बनाबय केर अछि। हम बिना गारंटी केर मुद्रा ऋणक सीमा १० लाखसँ बढ़ाकेँ २० लाख कए देलहुँ। एहिसँ पिछड़ा, दलित आ आदिवासीकेँ लाभ होयत। हम सब मिलिकेँ देशकेँ औद्योगिक केंद्र बनायब। देशक एमएसएमई क्षेत्र देशक केन्द्र बनि गेल अछि। छोट उद्योगक पैघ ताकत हमर महत्वपूर्ण डेग अछि। एहि बजटमे हुनका लोकनिक लेल ईज ऑफ क्रेडिटकेँ बढ़यबाक व्यवस्था कयल गेल अछि।”
पीएम नरेन्द्र दामोदरदास मोदी कहलनि, “हम सब मिलि कऽ भारतकेँ वैश्विक विनिर्माण केन्द्र बनायब। एहि बजटमे छोट उद्योगक लेल ऋणक सहजता बढ़ेबाक लेल नव योजनाक घोषणा कयल गेल अछि। विनिर्माण आ निर्यात पारिस्थितिकी तंत्रकेँ प्रत्येक जिलामे पहुँचेबाक लेल बजटमे महत्वपूर्ण घोषणा कयल गेल अछि। ई बजट स्टार्टअप, नवाचार पारिस्थितिकी तंत्रक लेल बहुत रास नव अवसर अनलक अछि।”
