18म लोकसभाक लेल 7 चरणमे मतदान भेल छल। काल्हि 4 जून मंगलदिन जे परिणाम आयल से अप्रत्यासित अछि। मतदाता कुनू पार्टीकेँ स्पष्ट बहुमत नहिं देलक। 18म लोकसभा चुनावमे सभ राजनीतिक दल आपसमे गठबंधन करैत एही चुनाव केर दू दलमे समैट देलक। एक तरफ बीजेपी केर संग अन्य दल एनडीए आ दोसर तरफ कांग्रेस केर संग अन्य दल इंडी गठबंधन चुनाव मैदान मे छल।
समाचार सम्प्रेषण तक 184 सीट भाजपा जीत चुकल छल आ 56 सीट पर बढ़त बनेने छल। बीजेपी 240 सीट केर संग अपन घटक दलक सहयोगसँ एनडीए २९२ सीटक संग बहुमतमे आयल आ ओतहि कांग्रेस केर मात्र 100 सीट भेटल आ इंडी गठबंधनकेँ 232 सीट भेटल। निर्दलीय 18 सीट पर जीत के तरफ अग्रसर छल।
आई सांझ तक पूरा मामिला स्पष्ट भऽ जायत जे सरकार के गठन के करत , ओना नरेन्द्र मोदी पुनः तेसर बेर प्रधानमंत्री पदक शपथ लेताह, ई लगभग तय अछि। ओना घटक दल टीडीपी 16 सीट जीत लेलक आ जदयू 12 सीट। कयास लगाओल जा रहल अछि जे राजनीतीमे संभावना हरदम खुजल रहैत अछि ताहि लेल आब कयास लगाओल जा रहल अछि जे इंडी गठबंधन सेहो सरकार बनबै के दवा पेश कय सकैत अछि। वर्तमान लोकसभाक कार्यकाल 16 जूनकेँ समाप्त भऽ रहल अछि आ ओहिसँ पहिने एकटा नव सदनक गठन करबाक अछि। नरेन्द्र मोदी सत्तारूढ़ भारतीय जनता पार्टी (भाजपा) सँ लगातार तेसर बेर प्रधानमंत्रीक पद पर बनल रहताह जखन कि विपक्ष भाजपाकेँ चुनौती देबाक लेल अपन ताकत लगने अछि।
