राजीव रंजन कहलनि जे नीतीश कुमारक नेतृत्वमे सरकार सुरक्षित अछि। तेजस्वी एकटा एहन नेता छथि जे जरूरत पड़ला पर छुट्टी मनाबय विदेश चलि जाइत छथि।
बिहारक मुख्यमंत्री नीतीश कुमारक स्वास्थ्य पर लगातार सवाल उठि रहल अछि, एहि बेर बिहारक पूर्व उपमुख्यमंत्री तेजस्वी यादवक बयानक बाद आरोप-प्रत्यारोपक सिलसिला शुरू भऽ गेल अछि। बिहारक पूर्व उपमुख्यमंत्री तेजस्वी यादव नीतीश कुमारक स्वास्थ्य केर लऽ कऽ षड्यंत्र करबाक आरोप लगओलनि, तखनि जदयू एकरा तेजस्वी यादवक बौखलाहट बतौलक।
तेजस्वी यादव अपन बयानमे नीतीश कुमार पर आरोप लगओलनि जे हुनकर भोजनमे कथित रूपसँ एहन चीज देल जाइत अछि, जाहि कारण हुनकर स्वास्थ्य लगातार बिगड़ि रहल अछि। तेजस्वी कहलनि जे नीतीश कुमारक हालत एहेन भऽ गेल अछि जे आब ओ बिहारकेँ सम्हारि नहि पाबि रहल छथि। तेजस्वी एहीठाम नहि रुकलथि, ओ नीतीश कुमार पर हुनकर अपने लोकक माध्यमसँ षड्यंत्र करबाक आरोप सेहो लगओलनि।
तेजस्वी यादवक बयान पर प्रतिक्रिया दैत जदयू केर राष्ट्रीय प्रवक्ता राजीव रंजन कहलनि कि ई तेजस्वी यादवक हताशा अछि, कियैकि ओ जनैत छथि जे नीतीश कुमारक बिना ओ किछु नहि छथि। राजीव रंजन कहलनि जे नीतीश कुमारक नेतृत्वमे सरकार सुरक्षित अछि आ नीक काज कऽ रहल अछि। बिहार आगू बढ़ि रहल अछि। तेजस्वी एकटा एहेन नेता छथि जे जरूरत पड़ला पर छुट्टी मनाबय विदेश चलि जाइत छथि।
जनतब जे पिछला कतेको माससँ नीतीश कुमारक स्वास्थ्यक बारेमे लगातार खबरि आबि रहल अछि आ एहि पर राजनीति सेहो भऽ रहल अछि, मुदा जेडीयू द्वारा लगातार इ कहल जा रहल अछि जे नीतीश कुमार पूर्णतः स्वस्थ छथि। बीच-बीचमे सामान्य लोक जँका स्वास्थ्य खराब भऽ जाइत अछि, मुदा एहेन नहि अछि जे हुनका कोनो गंभीर बीमारी वा समस्या अछि। एहि सबहक बीच एनडीए द्वारा लगातार ई कहल जा रहल अछि जे अगिला सालक बिहारमे विधानसभा चुनाव नीतीश कुमारक नेतृत्वमे लड़ल जायत।
