नवादा जिलाक मुफ्फासिल थाना क्षेत्रक कृष्णा नगर गामक दलित बस्तीमे आगि लगा देल गेल। एहि गामकेँ माँझी टोला सेहो कहल जाइत अछि। माँझी परिवारक अईठाम घर अछि। एहि घरसभमे आगि लगबयवला दलक दावा अछि जे ई जमीन ओकर अछि।
बिहारक नवादा जिलाक कृष्णा नगर गाममे आगि लगेबाक कारण भूमि विवाद कहल जा रहल अछि। जे दलित बस्तीमे आगि लगेलक ओ पड़ोसी गामक दबंग लोक अछि। पीड़ित लोकनिक आरोप अछि जे अभियुक्तक नजरि बस्तीक जमीन पर अछि। ई जमीन नहिं तऽ एतय रहनिहार लोकक अछि आ ने ओहि धमकाबलाक जे बस्तीकेँ नष्ट कयलक।
कहल जाइत अछि जे नदीक कातमे स्थित दलित बस्तीक जमीन एकटा मुसलमान व्यक्ति शमसुल मियाँक अछि। नवादा के एसडीएम अखिलेश प्रसाद इ खुलासा कयलनि। ओ बतौलनि अछि जे प्रशासनक जाँचमे जमीनक कागजात शमसुल मियाँक नाम पर दर्ज अछि। एसडीएम कहलनि जे ई बस्ती शमसुल मियाँक रैयाती जमीन पर बसल अछि। बस्ती अवैध रूपसँ बसल अछि।हुनकर कहब अछि जे एहि मामिलाक जाँच कएल जा रहल अछि।
बुधक राति भीड़ नवादाक कृष्णा नगर गामक दलित बस्तीमे आगि लगा देलक आ जरा देलक। बस्तीक लगभग ३० टा घर जरि गेल। बस्ती पर हमला करय बला भीड़क संख्या लगभग १०० केर करीब छल। पीड़ित लोकनि कहलनि जे बस्ती पर हमला करयवला भीड़ सशस्त्र छल। ओ सभ ५० राउंड फायरिंग कऽ दहशत पसारि देलक। बस्तीमे अफरातफरी मचि गेल। पीड़ितक कहब अछि जे हमलावर भीड़ पेट्रोल आ डीजल संग लऽ कऽ आयल छल। ओ सभ घर पर पेट्रोल डीजल ढारि आगि लगा देलक।
