राजस्व आ भूमि सुधार विभागक मंत्री कहलनि जे गामक कोनो व्यक्ति एहि विवादक विषयमे गप्प नहिं कऽ रहल अछि। पटनामे बैसल नेता लग काज नहिं अछि, तें ओ एहन बात कहि रहल छथि।
बिहारमे भूमि सर्वेक्षणक काज चलि रहल अछि आ सरकार एकरा गंभीरतासँ लेलक अछि। एम्हर ई खबरि आयल जे कतेको कारणसँ एकरा किछु मास लेल स्थगित कयल जा सकैत अछि। एकर कारण ई अछि कि जे फीडबैक भेटि रहल अछि ओहिसँ ई बाहर सामने आबि रहल अछि जे लोकसभकेँ परेशानी भऽ रहल अछि। मुदा, आब एहि पर भाजपा दिससँ स्पष्ट उत्तर आबि गेल अछि। राजस्व आ भूमि सुधार विभाग मंत्री आ भाजपा प्रदेश अध्यक्ष दिलीप जायसवाल सभ चर्चा पर विराम लगा देलनि अछि।
भूमि सर्वेक्षण पर रोकक बारेमे पूछल गेल सवाल पर दिलीप जायसवाल कहलनि कि एहेन कोनो बात नहिं अछि। सर्वेक्षणक काज ठीकसँ कयल जा रहल अछि आ होइत रहत। दिलीप जायसवाल मंगलकेँ पटनासँ दिल्ली जा रहल छलाह। एहि दौरान हवाई अड्डा पर संवाददाता सभक संग बातचीतमे ई बयान देलनि। ओ कहलनि जे गाममे कियो भूमि सर्वेक्षणक सम्बन्धमे विवादक बात नहिं कऽ रहल अछि।पटनामे बैसल नेता लग काज नहिं तऽ ओ एहन बात कहि रहल छथि।
मंत्री दिलीप जायसवाल कहलनि जे सर्वेक्षण भेलाक बाद बिहारक जमीनक भविष्य तय भऽ जाएत। कतहु कोनो विवाद नहिं अछि। सब किछु बढ़िया भए रहल अछि। कियो कहय जे सर्वेक्षणकेँ लऽ कऽ विवाद अछि। ओ विपक्ष पर निशाना साधैत कहलनि कि लोक सभकें किएक छटपटाहट भऽ रहल अछि ? सर्वेक्षणमे एतेक बढ़िया काज भऽ रहल अछि। भूमि सर्वेक्षण कएल जा रहल अछि, एहिसँ जमीनक विवाद समाप्त भऽ जायत। भू-माफियाकेँ लगैत अछि कि जे लोक सभ सरकारी जमीन पर अतिक्रमण कयने अछि, जकरा अवैध रूपसँ कब्जा कएल गेल अछि, ओ सभ पटनामे लाॅबी बना इ बात सभ करैत छथि।
पटना हवाई अड्डा पर संवाददाता सभसँ बातचीत करैत दिलीप जायसवाल तेजस्वी यादवक यात्रा पर सेहो निशाना साधलनि। दिलीप जायसवाल कहलनि जे हुनका घरमे मोन नहिं लागि रहल होयत, तेँ घुमि कऽ आबि जयताह।
