कटिहारमे आयोजित एकटा कार्यक्रममे मुख्यमंत्री नीतीश कुमार कहलनि, “हम गलतीसँ दू बेर गड़बड़ कयलहुँ, आब हम एनडीए केर छोड़ि कतहु नहिं जाएब। हमसभ पूरा राज्यक विकास कए रहल छी।
मुख्यमंत्री नीतीश कुमार एक बेर फेर कहलनि अछि जे ओ एनडीए केर नहि छोड़ब। भाजपा आ जेडीयूक गठबंधन जारी रहत। नीतीश कुमार बुधदिन कटिहारमे आयोजित कार्यक्रममे ई बात कहलनि। अपन संबोधनमे एक दिस मुख्यमंत्री तेजस्वी यादवक गठबंधन सरकारक संग गठबंधनक बारेमे संदेश देलनि, तऽ दोसर दिसि हिन्दू-मुस्लिम केर बात कए भाजपा केर संदेश सेहो देलनि।
मुख्यमंत्री नीतीश कुमार अपन संबोधनमे कहलनि जे हम गलतीसँ दू बेर गड़बड़ कयलहुं। आब हमर गठबंधन प्रबल रहत। राज्यमे भाजपा आ जेडीयू केर बीच गठबंधन पर ओ कहलनि कि आब कोनो तरहक दहिना-बामा नहि होएत। सभ तरहक विकास होएत।
नीतीश कुमार कहलखिन जे हमसभ पूरा राज्यक विकास कए रहल छी। जखन हम अएलहुं तखन ओहिसँ पहिले केर लोक किछु नहिं कयलक। ओहि समय राज्यमे बजट २४ हजार करोड़ छल। मुदा हमर बजट २.८२ लाख करोड़ रुपया अछि। हमसभ सब जगह सुविधा उपलब्ध करा रहल छी। हमसभ एतेक स्कूल बनौलहुँ जाहिसँ बच्चासभकेँ नीक शिक्षा भेटि सकय।
पहिने हिन्दू आ मुसलमानक बीच कतेको झगड़ा होइत छल।
मुख्यमंत्री नीतीश कहलनि जे हम महिलाक उत्थानक लेल काज कयलहुं। लड़का हो वा लड़की, सभ जाति वा धर्मक लोकक लेल हम सब काज कयलहुँ। पहिने हिन्दू आ मुसलमानक बीच कतेको झगड़ा होइत छल। जखन हमसभ सत्तामे अयलौंह, तखनिसँ हिन्दू-मुस्लिम झगड़ा नहिं होइत अछि। हम सभक लेल काज कयलहुँ।
कटिहारमे मुख्यमंत्री नीतीश ४०५•५३ करोड़ रुपयाक लागतसँ विभिन्न विभागक १८३ योजनाक उद्घाटन आ शिलान्यास कयलनि। एहिमे १०७.८७ करोड़ टाकाक लागतसँ ५२ योजनाक उद्घाटन आ २९७.६६ करोड़ टाकाक लागतसँ १३१ योजनाक शिलान्यास शामिल अछि।
मुख्यमंत्री कोसी नदीक कटावक कारण विस्थापित आ भूमिहीन परिवारकेँ देल जायवला आवास भूमिक लेल बंदोबस्ती पर्चाक सूची जारी कयलनि। कटिहारक बरारी अंचलमे ५२७९ आ कुर्सेला अंचलमे ३५३ विस्थापित आ भूमिहीन गरीब परिवारकेँ आवासीय भूमिक दानक लाभ देल गेल।
