विश्व स्वास्थ्य संगठनक 77म वार्षिकोत्सव जे कि, फ्रांसमे आयोजित कएल जाएत, ताहि बैसारमे, भारतक प्रतिनिधिमंडलमे समाजसेवी डॉ. प्रमोद कुमार झा केर नामक घोषणा सेहो कएल गेल अछि। एहि समाचारसँ मिथिला सहित मुंबई केर प्रवासी मैथिलमे प्रसन्नताक वातावरण बनल अछि।
जनतब दी, जे डॉ. प्रमोद कुमार झा मूल रूपसँ मधुबनी जिलाक कलुआही प्रखंड अंतर्गत बाबू पाली गामक निवासी छथि, आ वर्तमानमे मुंबईमे रहि अप्पन जीवन यापन संगहि समाजसेवाक कार्य सेहो करैत छथि। अनेको सम्मानसँ सम्मानित डॉ प्रमोदक स्वास्थ्य सेवामे देल गेल निरंतर योगदानकेँ देखैत हुनकर चयन एकटा महत्वपूर्ण उपलब्धि मानल जा रहल अछि।
डॉक्टर प्रमोद कुमार झा निरंतर, निर्धन आ मेधावी छात्र – छात्रा सभक शिक्षामे सहायता करैत रहल छथि। करोना कालमे करोना रोगसँ मृत भेल पॉलिसी धारकक परिजनकेँ क्लेम दिएबाक कार्य ओ, बढ़ि-चढ़ि क’ कएलनि।
डॉ प्रमोद मानव सेवाकेँ अप्पन लक्ष्य बुझैत मिथिला क्षेत्रमे बाढ़ि सनक आपदामे सेहो, मधुबनी जिलाक विभिन्न भागमे बाढ़ि पीड़ित लेल ठाढ़ रहलथि। जिलामे हजारो बाढ़ि पीड़ितक मध्य वस्त्र आ खाद्य सामग्रीक आपूर्ति करबैत रहलथि।
डॉ प्रमोद कुमार झा केर एहि सम्मानसँ नहि मात्र ओ अथवा हुनक परिजन, अपितु समस्त मिथिलाक गौरव सेहो बढ़ल अछि।
