झंझारपुर लोकसभा निर्वाचन क्षेत्र संख्या 07 मे आजुक भोर सात बजेसँ सभ मतदान केंद्र पर तेसर चरणक मतदान शुरू भऽ जायत। प्राप्त जानकारीक अनुसार जिला निर्वाचन पदाधिकारी अरविन्द कुमार वर्मा आ जिला पुलिस कप्तान एहि चुनाव प्रबंधनक अंतिम जायजा काल्हि लेलनि। जिला प्रशासन पूरा सक्रिय अछि जे चुनाव शांति पूर्वक आ निष्पक्ष संपन्न होय। जिलामे अधिकसँ अधिक मतदान होय ताहि लेल जिला प्रशासनक तरफसँ अथक प्रयास कयल गेल अछि। एकर कतेक लाभ भेटत से चुनाव संपन्न भेलाक बाद सामने आओत। चुनावक लेल तैनात बूथ परहक सभ कर्मीकेँ काल्हि दिनमे ३ बजेक बाद जिलासँ बूथक लेल रवाना कयल गेल। लगभग सभ बूथ पर देर सांझ लगभग ७:३० बजे तक सभ कर्मी पहुँचि गेल छलाह।
जिलाक एहि लोकसभा सीट पर कुल 10 टा उम्मीदवार ठाढ़ छथि। रामप्रीत मंडल, सुमन कुमार महासेठ, बबलू कुमार, गंगा प्रसाद यादव, गौरी शंकर साहू, गुलाब यादव, राजीव कुमार झा, राम प्रसाद राउत, विद्या नन्द राम, विजय कुमार मंडल। एही 10 टा उम्मीदवारक भाग्यक फैसला मतदातागण आइ भोरसँ करताह।
जिला प्रशासन सूचना आ संवाद लेल लोकसभाक अलग-अलग क्षेत्रमे विधानसभा वार नियंत्रण कक्षक लेल दूरभाष संख्या उपलब्ध करवा चुकल अछि। कुनु तरहक असामाजिक गतिविधिकक लेल जिला प्रशासन जनतासँ सूचनाक अपेक्षा राखैथ अछि।
खजौली – 06276-222136, 06276-222137, 06276-222138, बाबूबरही – 06276-222141, 06276-222142, 06276-222143, राजनगर – 06276-222144, 06276-222145, 06276-222146, झंझारपुर – 06276-222151, 06276-222152, 06276-222153, फुलपरास – 06276-222154, 06276-222155, 06276-222156 आ लौकहा 06276-222157, 06276-222158 , 06276-222159 अछि।
विधानसभा वार 24×7 हंटिंग लाइनक व्यवस्थाकेँ सुचारु रूपसँ संचालन आ सुचना प्राप्त करबाक लेल तीन टा ग्रुप बनाओल गेल अछि।
