उत्तर प्रदेशक सहारनपुरमे एकटा चुनावी जनसभाकेँ सम्बोधित करैत प्रधानमंत्री नरेन्द्र मोदी कहलनि जे जम्मू-कश्मीरसँ अनुच्छेद ३७० हटायब हमर मिशन रहल अछि आ ई मिशन सेहो पूरा भऽ गेल अछि। कश्मीरमे पत्थरबाज जे पाथर फेंकने छल, ओ सभटा पाथरकेँ जमा कऽ मोदी ओहीसँ विकसित जम्मू-कश्मीरक निर्माण कऽ रहल अछि।
ओ कहलनि “भारतकेँ एकटा मजबूत देश बनेनाइ भाजपाक प्रतिबद्धता अछि। अर्थात जेहेन भाजपाक नीयत अछि, जेहेन निष्ठा अछि, नीति सेहो ओहिना बनैत अछि। ताहि लेल आइ प्रत्येक भारतीय अनुभवसँ कहि रहल अछि जे नियत सही तऽ नतीजा सही।
पीएम मोदी कहलनि कि भाजपा सरकार बिना भेदभावक काज करैत अछि। हमर सोच अछि जे सरकारक योजना सभ वर्ग, हर जाति, हर व्यक्ति तक पहुंचबाक चाही। ताहि लेल भाजपा सरकार १० साल धरि पूरा ताकतक संग काज कयलक अछि। भाजपा देशक प्रत्येक नागरिकक समस्या कम कऽ रहल अछि। सबके लेल नव अवसर पैदा कय रहल अछि। सहारनपुरक लकड़ीक नक्काशी आ एहिठामक लोकक कौशल दूर-दूर धरि प्रसिद्ध अछि। तें योगी होइ वा मोदी, हमरा अहांक परवाह अछि। तेँ हम दुनू बेर-बेर एकटा बात कहैत छी – वोकल फॉर लोकल।
पीएम मोदी कहलनि “दस साल पहिने हम एकटा चुनावी रैली लेल सहारनपुर आयल छलहुं। ओहि समय देश बहुत निराशा, पैघ संकटक कालसँ गुजरि रहल छल। तखन हम अहांकेँ गारंटी देने छलहुं जे हम देशकेँ झुकए नहिं देब, देशकेँ रुकए नहिं देब। हम संकल्प लेलहुँ जे अहाँक आशीर्वादसँ हम हर परिस्थितिकेँ बदलब, निराशाकेँ आशामे बदलब, आशाकेँ विश्वासमे बदलब। अहाँ अपन आशीर्वादमे कोनो कसरि नहिं छोड़लहुँ आ मोदी अपन मेहनतमे कोनो कसर नहि छोड़लक।”
प्रधानमंत्री मोदी शक्तिसँ लड़बाक बयान लेल विपक्ष पर निशाना साधैत कहलनि जे हमर ई स्थान माँ शक्तिक पूजाक स्थान अछि, हमर ई स्थान माँ शक्तिक साधनाक स्थान अछि आ भारतक कोन-कोनामे शक्तिक उपासना हमर स्वाभाविक, आध्यात्मिक यात्राक हिस्सा अछि। हम एकटा एहन देश छी जे शक्तिक पूजासँ कहियो इनकार नहिं करैत छी। मुदा ई देशक दुर्भाग्य अछि जे इंडी एलायंसक लोक खुलि कऽ चुनौती दऽ रहल छथि जे हुनकर लड़ाई शक्तिक विरुद्ध अछि। की कियो शक्तिकेँ समाप्त कए सकैत अछि ? कियो शक्तिक सामर्थ्यकेँ चुनौती दऽ सकैत अछि ? जे सभ शक्तिकेँ नष्ट करबाक प्रयास कयलक अछि, ओहि सभकेँ की हाल भेल अछि, इ इतिहास आ पुराणमे अंकित अछि।
