प्रशांत किशोर दावा कयलनि जे बिहारमे अगिला सरकार जन सुराज द्वारा बनाओल जा रहल अछि आ राज्यक अगिला मुख्यमंत्री सेहो जन सुराज पार्टीसँ होयत।
जन सुराज पार्टीक संस्थापक प्रशांत किशोर बिहारक राजनीतिक पिच पर बैटिंग करबा लेल तैयार छथि। ओ दावा कयलनि जे बिहारमे अगिला सरकार जन सुराज द्वारा बनाओल जा रहल अछि आ राज्यक अगिला मुख्यमंत्री सेहो जन सुराज पार्टीसँ होयत। ओ इहो कहलनि जे बिहारक जनता तय करतनि जे मुख्यमंत्री के बनत।
बिहारमे २०२५ मे विधानसभा चुनाव हेबाक अछि। एहि चुनावमे ई पहिल बेर होयत जखन प्रशांत किशोर अपन पार्टी जन सूरजक बल पर चुनाव मैदानमे उतरताह।
मुस्लिम उम्मीदवार पर पीके कहलनि, जे २०२५ केर विधानसभा चुनावमे मुस्लिम समुदायक ४० लोककेँ उम्मीदवार बनाओल जायत। राजदक लोक ३० सालसँ मुसलमानक रहनुमा होबय केर दावा करैत अछि, हम हुनका चुनौती दैत छी जे जतय हुनकर मुस्लिम उम्मीदवार जीतल अछि, ओतय चुनावमे मुस्लिम उम्मीदवार ठाढ़ करु, हम ओतय हिन्दू उम्मीदवारकेँ ठाढ़ करब। राजद एखन धरि मुसलमानक वोट लऽ रहल अछि, ओ मुसलमानक जनसंख्याक हिसाबसँ हुनका टिकट दऽ कऽ देखाबय।
प्रशांत किशोर कहलनि, “हम एकटा बात स्पष्ट करय चाहैत छी जे विधानसभा चुनावमे हमर लड़ाई राजदक संग नहिं अछि। लोकसभा चुनावमे राजदक प्रदर्शन देखलौंह अछि। हमर लड़ाई एनडीए केर संग अछि। संगहि बिहारक मुख्यमंत्री नीतीश कुमार पर निशाना साधैत ओ कहलनि जे लोकसभामे ‘वक्फ संशोधन विधेयक-२०२४’ पेश कयल गेल। बिहारसँ नीतीश कुमार एकर समर्थन कयलथि। जँ अहाँक राजनीतिमे कोनो भागीदारी नहिं होएत तऽ सरकार ओहिना कानून बना देत। ओना ई विधेयक एखनि धरि पारित नहिं भेल अछि, जेपीसीमे एकर चर्चा चलि रहल अछि, मुदा काल्हि उहे नीतीश कुमार महागठबंधनमे वापस आबि मुस्लिम समुदायक संग ठाढ़ हेबाक बात करताह, मुदा जनता आब सब किछु बुझि गेल अछि।
