बहेड़ा थाना क्षेत्रक अलग-अलग गाममे लगातार किछु माससँ बंद घर सभमे भऽ रहल चोरीक घटना सभक अंजाम देबयवला गिरोहक चारिटा अपराधीकेँ पुलिस गिरफ्तार कऽ मामिलाक उद्भेदन कयलक अछि।
एहिकेँ लऽ कय एसडीपीओ आशुतोष कुमार बहेड़ा थाना पर गिरफ्तार अपराधी संग प्रेस वार्ता आयोजित कऽ जानकारी देलनि जे विगत २६ दिसंबरकेँ विशेष समकालीन छापामारी अभियानक दौरान प्राप्त गुप्त सूचनाक आधार पर विशेष टीमक संयुक्त कारवाई केर तहत मधुबनी जिलाक लहेरियागंज निवासी शातिर अपराधी मंगल शाह, विसफी थाना क्षेत्रक सोहास गांव निवासी अमित कुमार यादव, रहिका थाना क्षेत्रक मारड़ निवासी धनिक लाल पासवान आ मधुबनी नगर थाना क्षेत्रक किशोरीलाल चौक निवासी दीपक कुमारकेँ गिरफ्तार कयल गेल अछि ।
एहि गिरफ्तार अपराधी सभक निशानदेही पर पुलिस एकटा देसी कट्टा, १५ जिंदा कारतूस, तीनटा मोटरसाइकिल, १,५६,५८६ (एक लाख छप्पन हजार पांच सय छियासी) टाका नगद , ९ टा मोबाइल , ०१ टा ताला तोड़यवाला राॅड , २२ टा चांदीक सिक्का , चांदीक बिछिया, हनुमानी, चांदीक ग्लासक संग एकटा लोकक चोरी कयल गेल बैंक पासबुक, आधार कार्ड, बहेड़ा बाजारक दूटा ज्वेलर्स केर खाली पर्स , एकटा लैपटॉप , एकटा कैमरा , चांदीक चारि जोड़ पायल , छोटका तीनटा टॉर्च, चारिटा घड़ी , पांचटा चांदीक औंठी आ एकटा सोनाक औंठी बरामद कयल गेल अछि ।
एसडीपीओ कुमार बतेलनि जे गिरोहक सरगना मंगल साह कतेको बेर अपराधक घटना सभकेँ अंजाम दऽ जेल जा चुकल अछि । एखनो एकरा ऊपर विभिन्न थाना सभमें हत्या आ लूटक मामिला सभ दर्ज अछि। अमित कुमार यादवक ऊपर सेहो मधुबनीमे एकटा आपराधिक मामिला दर्ज अछि जाहिमे ई फरार चलि रहल छल। एसडीपीओ कुमार आगाँ कहलनि जे एहि गिरोहक एकटा आर अपराधी सक्रिय अछि जे भागयमे सफल रहल। पुलिस ओकरा खोजि रहल अछि। एकरा संगहि सभ गिरफ्तार अपराधीक आर आपराधिक पृष्ठभूमि खंगालल जा रहल अछि।
विदित अछि जे विगत तीन माससँ बहेड़ा थाना क्षेत्रक अलग – अलग गाम सभमें बंद घर सभ केर ताला तोड़िकय भऽ रहल चोरीक घटनासं पुलिस आ आमजन परेशान छल । चोरीक घटनाक उद्भेदनसँ क्षेत्रक लोक सबहक संग-संग पुलिस प्रशासन सेहो राहतक सांस लेलन्हि अछि । स्थानीय लोकक कहब छल जे गिरफ्तार मंगल शाह थानाक बगलक गाममें किरायाक मकानमे अपन पत्नी संग रहैत छल । मंगल दिनमे नारियल बेचबाक काज करैत छल आ रातिमे अपन अन्यान्य संगी साथी संग बंद घर सबहक ताला तोड़ि कय चोरी करैत छल। परिवारक संग किरायाक मकानमे रहि रहल हेबाक कारणे लोक ओकरा उपर कोनो तरहक शक-सुबहा नहि कऽ पाबैत छल।
एसडीपीओ कुमार कहलनि जे एहि अभियानमे थाना अध्यक्ष चंद्रकांत गौड़ी , दरोगा रंजीत कुमार सिंह , दिव्या कुमारी , रजनी कुमारी , रंजय कुमार सिंह , थानाक सशस्त्र बल , जिला तकनीकी इकाई केर सदस्यक संग स्थानीय लोकक सहयोग सराहनीय रहल।
