बिहारमे रविदिन आधा दर्जनसँ बेसी ठाम तटबन्ध क्षतिग्रस्त भऽ गेल । ५६ सालक बाद बौरायी कोसी नदी सेहो तबाहीक संकेत देबय लागल अछि। कोसी बैराजसँ जरूर पानि आबि रहल अछि, मुदा तटबन्ध पर आब खतरा मंडराय लागल अछि। दरभंगामे रविदिन मध्यरात्रिक बाद तटबन्ध टूटि गेल, जाहिसँ दूटा प्रखंडमे बसल लाखक आबादी प्रभावित भेल। लोक सुरक्षित स्थान पर पलायन करय लागल अछि।
दरभंगा जिलाक किरातपुर प्रखंडक भूभौल गामक समीप तटबन्ध रविदिन राति लगभग १ बजे कोसी बैराजसँ पानि छोड़लाक बाद कोशी नदीक जलस्तर बढ़लासँ टूटि गेल। तटबन्ध टूटलाक कारण किरातपुर प्रखण्ड आ घन्यश्यामपुर प्रखण्डक दर्जनों गाममे बाढ़िक पानि घुसि गेल अछि। जाहि कारणेँ लाखो लोकक जनसंख्या प्रभावित भऽ रहल अछि। यद्यपि प्रशासन देर राति धरि तटबन्धकेँ बचयबाक प्रयास कयलक, मुदा देर राति कोसी नदीक तेज प्रवाहक सोझाँ तटबन्ध दम तोड़लक।
दरअसल किरातपुर ब्लॉकक जमालपुर थाना क्षेत्रक नरकटिया गांव आ भुभौल गांम लग रविदिन दुपहरियासँ तटबंध पर बनल सड़क पर पानि बहैत छल। जकरा प्रशासन लगातार बालु केर सैंड बैग लगा कs बचाबय केर कोशिश कऽ रहल छल। संगहि लोकसभसँ सतर्क आ सावधान रहबाक अपील कयल जा रहल छल। दरभंगाक जिलाधिकारी स्वयं घटनास्थल पर पहुँचलाह आ स्थितिकेँ नियंत्रित करबामे लागल छलाह। मुदा ओ तटबन्धकेँ बचयबामे सफल नहिं भेलाह।
वर्तमानमे कोसी नदीक तांडवक कारण किरतपुर प्रखण्ड आ घनश्यामपुर प्रखण्डक लोकमे हाहाकार मचल अछि। लोक अपन मवेशी आ परिवारक संग ऊँच स्थानक संग तटबन्ध पर शरण लऽ रहल छथि। संगहि प्रशासन बाढ़ि प्रभावित लोककेँ सहायता देबाक काज शुरू कs देलक अछि। बाढ़िक स्थितिकेँ देखैत जिलाधिकारी कतेको महत्वपूर्ण निर्देश सेहो देलनि अछि। संगहि, लोकसभसँ अपील कयलनि अछि जे घबरयबाक कोनो आवश्यकता नहिं अछि। हरसंभव मदद कएल जाएत, जिला प्रशासन अहांक संग अछि।
