संसारक दस बड़का शेयर बजारमे सँ मार्च महिनामे भारतीय शेयर बजार सर्वाधिक 9.4 प्रतिशत (डॉलर मे) के रिटर्न देलक। ई जानकारी नवीनतम एक्सचेंज डेटासँ प्राप्त भेल। पाँच मासक लगातार मंदीक बाद विगत चारी वर्षमे ई सबसँ पैघ वृद्धि अछि।
एक्सचेंज डेटाक अनुसार, बॉम्बे स्टॉक एक्सचेंज (बीएसई) मे सूचीबद्ध समस्त कम्पनी सभक कुल बाजार पूंजीकरण फरवरीक अंतमे लगभग 4.39 ट्रिलियन डॉलरसँ बढ़ि कऽ लगभग 4.8 ट्रिलियन डॉलर भ’ गेल। ई मई 2021 केर बाद सबसँ पैघ मासिक उछाल अछि। भारत अन्य प्रमुख बजार सभसँ नीक प्रदर्शन कएलख। भारतक बाद जर्मनीमे सबसँ बड़का 5.64 प्रतिशतक वृद्धि भेल। ई तेजी केर कारण जर्मनीक शेयर बजारक पूंजीकरण बढ़ि कऽ 2.81 ट्रिलियन डॉलर भ’ गेल अछि।
जापान आ हांगकांग केर शेयर बाजारमे क्रमशः 4.9 प्रतिशत आ 4 प्रतिशतक वृद्धि भेल। तहिना, फ्रांस, यूनाइटेड किंगडम आ कनाडाक शेयर बाजार सभमे मामूली वृद्धि दर्ज कएल गेल।
दोसर दिसि, संसारक सबसँ पैघ शेयर बाजार यूएसमे 3.7 प्रतिशतक गिरावट भेल अछि। तहिना, सऊदी अरबक शेयर बाजारमे 4.4 प्रतिशतक गिरावट आयल अछि। भारतीय शेयर बाजारमे मार्चमे निफ्टी आ सेंसेक्समे 5 प्रतिशतसँ बेसीके तेजी देखल गेल अछि। एहि दौरान बीएसई मिडकैप आ स्मॉलकैप इंडेक्स क्रमशः 8.4 प्रतिशत आ 9.8 प्रतिशतक रिटर्न देने अछि। भारतीय शेयर बाजारमे खरीदारीक कारण शॉट कवरिंग आ आरबीआई द्वारा मईमे संभावित ब्याज दरसभमे कटौती केर मानल जा रहल अछि।
अमेरिकी फेडरल रिजर्व द्वारा ई संकेत देलाक बाद जे ओ 2025 मे दू बेर ब्याज दर कम कऽ सकैत अछि, निवेशक लोकनिक मनोदशाक सेहो सुधार भेल अछि। भारतमे सेहो खुदरा महंगाई दर फरवरीमे सात महिनाक निचला स्तर 3.61 प्रतिशत पर रहल, जे अर्थव्यवस्था लेल सकारात्मक संकेत अछि आ एहिसँ विकास दरकेँ बढ़ावा भेटत।
