राजद नेता तेजस्वी यादव शनिकेँ पटनामे एकटा प्रेस कॉन्फ्रेंस केर संबोधित कएलथि। ओ कहलथि जे जखनि हमर सरकार बनत त’ वक्फ संशोधन विधेयक केर कूड़ादान अर्थात कचराक डिब्बामे फेंकि देब। एहि दौरान तेजस्वी यादव कहलथि, ‘जेना आरक्षणक लड़ाईमे पिछड़ा आ दलितक लेल हम सभ मौजूद रहलहुँ, कोर्टमे गेलहुँ, सदनमे आ सड़क पर सेहो प्रदर्शन कएलहुँ। एहि प्रकार मुसलमान भाइ सभक वक्फ बिल लेल हम सभ सुप्रीम कोर्ट गेल छी। जखनि हमर सरकार बनत तऽ एहि बिलकेँ कूड़ेदानमे फेंक देल जायत।
तेजस्वी यादव कहलथि- चुनावमे हुनका सभकेँ झेलय परत। तेजस्वी यादव कहलथि, ‘हम हिंदू भाइ सभसँ कहय चाहैत छी जे ई (केंद्र सरकार) नहि चाहैत अछि जे दलित, पिछड़ा, अति पिछड़ा मुख्य धारामे आबय। ई एकर सभक रोकबाक साजिश अछि। अहाँ सभ देखलौंह कि 65 प्रतिशत आरक्षणकेँ ई सभ रोकबाक काज केलथि। हमर मानब अछि जे मुसलमानक बाद ई ईसाई, सिख सभ पर हमला करत। खास कऽ हिन्दू पर जेकर आबादी 80 प्रतिशत अछि, ओहि पर ई सभ निशाना लगाएत। पार्लियामेंटमे जे व्यक्ति सभ एकर समर्थन कयलथि, हुनका सभकेँ आबि रहल चुनावमे सामना करए पड़त।
तेजस्वी यादव कहलथि जे हम देखलौंह मुंगेरमे डिप्टी सीएम सम्राट चौधरीकेँ अधिकारी मटन परोसि रहल छल। नीतीश कुमारक फोटो हटाकय मोदी जीक मात्र तस्वीर लगाओल जा रहल अछि। चुनाव धरि ई सभ नीतीशजीकेँ जेना-तेना संग राखत आ ओकर बाद की परिणाम होयत से सभकेँ पता अछि। कोन एहेन नेता अछि देशक, जे वक्फ बिल पर नहि बाजल। मुदा हमर मुख्यमंत्री नीतीश कुमार एक शब्द वक्फ बोर्ड पर नहि बजलाह। वक्फ बोर्डक लड़ाई संसदक बाद सुप्रीम कोर्ट आ सड़क पर होएत। हम सभ कोर्टमे याचिका दायर कऽ देलहुँ अछि।
ओतहि चिराग पासवानक बयान पर तेजस्वी कहलाह जे ओ पाछूसँ छुरी मारैत छथि। मुँहमे मिठ-मिठ आ पाछूसँ ई सभ। हुनक पिता रामविलास जी गोधरा कांडक बाद इस्तीफा देने छलथि। तखनि तऽ ताहि समय पिता गलत छलथि, अथवा एखनि ई गलत छथि।
की जदयूसँ इस्तीफा देबयवाला अल्पसंख्यक नेताक राजद स्वागत करत ? एहि प्रश्न पर तेजस्वी यादव कहला कि के इस्तीफा द रहल अछि। सभ स्वतंत्र छथि। जँ आबय केर इच्छा हेतनि तऽ पार्टी विचार करत। राज्यपाल आरिफ मोहम्मद खान वक्फ संशोधन विधेयकक समर्थन कएलनि अछि। एहि पर तेजस्वी कहलनि, हुनक अपन राय भऽ सकैत अछि। हम अपन राय राखय आएल छी।
