दरभंगा जयनगर रेलखंड पर अवस्थित राजनगर एकटा महत्वपूर्ण रेलवे स्टेशन अछि।एहि स्टेशन परसँ नित्य हजारो बटोही ट्रेनसँ यात्रा करैत छथि। राजनगरक स्थानीय लोक सभके अलावा आनोआन प्रखण्डक लोक एहि स्टेशनसँ यात्रा करैत छथि। एहि ठाम सशस्त्र सीमा बलक शिविर रहलासँ सेहो एहि स्टेशनक महत्व बढि जाइत अछि। मुदा लाखो टाका रेलवेक राजस्व देनिहार एहि स्टेशन पर बटोही सभकेँ जे सुबिधा भेटबाक चाही से नहि भेट पाबि रहल अछि। बटोही सभकेँ बैसबाक लेल पर्याप्त बैठक एहि ठाम नहि अछि। एहि स्टेशन पर जतेक लोक ट्रेन पकड़बाक लेल अबैत छथि, ओतेक बैसारक व्यवस्था नहि कयल गेल अछि। परिणाम स्वरूप ट्रेन पकड़बाक लेल आयल बटोही सभके ठाढ़ भऽ ट्रेनक प्रतीक्षा करय पड़ैत छन्हि। एहि स्टेशन पर छाँहक व्यवस्था पर्याप्त नहि रहलासँ लोकसभकेँ गर्मी आ बरसातक मौसममे पैघ दिक्कतक सामना करय पड़ैत अछि। छाँहक व्यवस्था नहि रहलासँ पाखैर गाछ तर लोक सभकेँ रहय परैत अछि। जकर ऊपरसँ बटोही सभकेँ चिड़िया सभक बिटसँ कपड़ा वस्त्र गन्दा होयबाक चिंता करैत गाछ तर रहय पड़ैत छन्हि।
सभसँ बेसी दिक्कत तऽ बटोही सभकेँ राजनगर स्टेशनसँ ट्रेन पर चढ़बाक आ उतरबाक काल करय परैत छन्हि। किएक तऽ एहि ठामक प्लेटफार्म बहुत नीचाँ अछि। प्लेटफॉर्म नीचाँ एतेक की बुझना जाइत अछि जे रेलवे पटरीक ऊंचाईमे प्लेटफार्म अछि। एतेक नीचाँ प्लेटफार्मसँ उच्च ट्रेनमे चढ़बा उटरबामे लोक सभ परेशान भऽ जाइत अछि। खासकय वृद्ध आ बच्चा आ जनानी सभकेँ सबसँ बेसी परेशानी होइत अछि। रेलवे केर एकटा कर्मी कहैत छथि जे एहिसँ बेसी उच्च प्लेटफॉर्म करबामे एतय तकनीकी समस्या अछि ताहि कारणे एतबा उच्च कय प्लेटफॉर्म केर छोड़ल गेल अछि। मुदा नीचाँ प्लेटफॉर्म सबसँ बेसी कष्टदायी अछि , ई सभ गोटे स्वीकार करैत छथि।
एकरा अलाबा राजनगर स्टेशन पर शुद्व पेयजलापूर्तिक सेहो समस्या अछि। दुनु प्लेटफार्म पर एक-एकटा कऽ चापाकल तऽ अछि मुदा एहि चापाकलक जल पीबाक योग्य नहि अछि।
राजनगर स्टेशन पर बटोही सुविधा बढ़यबाक मांग नियमित यात्रा कयनिहार बटोही सभ द्वारा कयल गेल अछि।
