वंचित, शोषित वर्ग राजगक प्राथमिकता, जिनका कियो नहिं पूछलक, पूजि रहल छी तिनका हम : पीएम मोदी

पूर्णिया
*

प्रधानमंत्री नरेन्द्र मोदी मंगल दिन मिथिला क्षेत्रीय बिहारक सीमावर्ती पूर्णियामे एकटा चुनावी जनसभाकेँ सम्बोधित कयलनि, किसान, युवाक बात कयलनि आ एहि क्षेत्रमे अवैध घुसपैठक मुद्दा उठौलनि। ओ पूर्णियामे हवाई अड्डा बनयबाक वचन देलनि, ओ जंगलराज आ आपातकालक बात करैत विरोधीसभकेँ निशाना बनओलनि।

ओ संविधान लागू होयबाक ७५ वर्ष पूरा भेलापर ‘संविधान पर्व’ मनयबाक घोषणा कयलनि। पूर्णियाक रंगभूमि मैदानमे एनडीए उम्मीदवार संतोष कुशवाहाक पक्षमे एकटा चुनावी सभाकेँ संबोधित करैत पीएम मोदी भ्रष्टाचारीकेँ चेतावनी दैत कहलनि कि अगिला पांच सालमे भ्रष्टाचारी पर पैघ हमला होएत। सीमावर्ती मिथिला बिहारक एकटा संवेदनशील क्षेत्र अछि। वोट बैंकक कारण एहि क्षेत्रमे अवैध घुसपैठक खतरा बेसी अछि, जाहि कारण हमर गरीब आ दलित भाईकेँ तकलीफ उठाबय पड़ैत अछि।

ओ आश्वासन देलनि जे देशक सुरक्षासँ खेलयवला प्रत्येक तत्व सरकारक नजरमे अछि। ४ जूनक परिणाम मिथिलाक एहि सीमावर्ती क्षेत्रक सुरक्षा तय करत। एहिठामक किसान मकई, जूट, मखानक खेती करैत छथि। पूर्णियाक किसान देशक मखानक २० प्रतिशत उत्पादन करैत छथि। एनडीए सरकार मखानकेँ सुपरफूडक रूपमे बढ़ावा दऽ रहल अछि। दुनिया भरिमे मोटगर अनाजकेँ बढ़ावा देलक। जी-२० मे दुनिया भरिक मेहमानसभकेँ मोटगर अनाज खुएलौंह, जकरा श्रीअनाज कहल जाइत अछि। एकर लाभ किसान तक पहुंच रहल अछि। पूर्णियामे देशक पहिल ग्रीन फील्ड इथेनॉल संयंत्र स्थापित कयल गेल अछि।

ओ आश्वासन देलनि जे आब ओ दिन दूर नहिं अछि जखन पूर्णियामे सेहो विमान उतरत। अहाँक सपना मोदीक संकल्प अछि, तेँ गाम, गरीब, दलित, वंचित दशक धरिसँ जाहि समस्याक सामना करय पड़ि रहल छल, १० सालमे तकर सभकेँ समाधान देलहुँ। देशमे २५ करोड़ लोक गरीबीसँ बाहर आयल। ४ करोड़ लोककेँ पक्का घर भेटल। देशक ५० करोड़सँ बेसी गरीब आ वंचित लोकक लेल बैंक खाता खोलल गेल। आब ७० सालसँ बेसी उम्रक लोककेँ सेहो मुफ्त इलाज भेटत। ई एखन एकटा ट्रेलर अछि। आब हमरा पूर्णिया, मिथिलाक सीमावर्ती क्षेत्र, बिहार आ देशकेँ बहुत आगू बढ़ेबाक अछि।

ओ कहलनि जे वंचित, शोषित वर्ग राजगक प्राथमिकता अछि, जिनका कियो नहिं पुछलक, हम आइ हुनकर पूजा कऽ रहल छी। एखनहु बहुत किछु करए केर अछि। अमृत महोत्सव स्वतन्त्रताक ७५ वर्षक बाद मनाओल गेल छल, तहिना संविधानक ७५ वर्षक पाबनि सेहो मनाओल जेबाक अछि। हम बाबा साहेब केर संदेशकेँ देशक कोना-कोना तक पहुंचायब। जे आइ संविधानक बात कऽ रहल छथि ओ आपातकालक दौरान संविधानकेँ बंधक बना कऽ तोड़बाक काज कयलनि। जे एक परिवारक मुट्ठीमे सत्ता राखय चाहैत छथि, हुनकर आँखिमे संविधान खटकैत अछि।

सीमावर्ती मिथिला क्षेत्रमे एनडीए प्रत्याशी संतोष कुशवाहाक मुकाबला राजदक बीमा भारतीसँ अछि। ओना पूर्व सांसद राजेश रंजन उर्फ पप्पू यादव निर्दलीय चुनावी मैदानमे उतरि, एहि लड़ाई केर त्रिकोणीय बनाबय केर कोशिश कऽ रहल छथि। एहि निर्वाचन क्षेत्रमे दोसर चरणमे २६ अप्रैलकेँ मतदान होयत।