कांग्रेस महासचिव प्रियंका गांधी वाड्रा बुधदिन पहिल चरणक चुनाव प्रचारक अंतिम दिन सहारनपुर पहुँचलीह। एतय प्रियंका गांधी कांग्रेस उम्मीदवार इमरान मसूदक पक्षमे रोड शो कयलनि। एहि दौरान प्रियंका गाँधी जनताकेँ सम्बोधित करैत केन्द्रक मोदी सरकारपर भयंकर प्रहार कयलनि।
प्रियंका गाँधी जैन बागक जैन मन्दिरमे भगवान महावीरक आशीर्वाद लेलनि। एकर बाद ओ दुपहरिया १२ बजे अपन रोड शो शुरू कयलनि। एहि दौरान कांग्रेस आ सपा नेतामे उत्साह देखल गेल।
प्रियंका गाँधीक रोड शो रायवाला, जेबीएस इंटर कॉलेज, कम्बोहक पुल, रांघडोक पुल आ कुतबशेर होइत गुरुद्वारा रोड पर समाप्त भेल। एहि क्षेत्रमे मुसलमान लोकनि रहैत छथि।
बतबैत चली जे एखन धरि इंडिया एलायंसक कोनो फायर ब्रांड लीडर पश्चिमी उत्तर प्रदेशमे जनसभा करय नहिं पहुँचल छल। पहिल चरणक चुनावक प्रचारक अंतिम दिन प्रियंका गाँधी गठबन्धनक उम्मीदवार इमरान मसूदक लेल प्रचार करबाक लेल बुधदिन सहारनपुर पहुँचलीह। प्रियंका गाँधी सहारनपुर महानगरमे एकटा रोड शो कयलनि। रोड शोसँ पहिने प्रियंका गांधीकेँ सिद्धपीठ शाकम्भरी देवीक दर्शन करय केर छल, मुदा रामनवमीक दिन श्रद्धालुक भीड़मे सुरक्षा कारणसँ जिला प्रशासन अनुमति नहिं देलक।
कार्यकर्ता लोकनि द्वारा रोड शो मार्गकेँ झण्डा आ गुब्बारासँ सजाओल गेल छल। प्रियंका गाँधीक सङ्ग मुख्य रथपर कांग्रेसक उम्मीदवार इमरान मसूद, जिला अध्यक्ष संदीप राणा सहित कतेको पैघ नेता उपस्थित छलाह।
प्रियंका गाँधी गोल कोठीसँ थाना कुतुबशेर धरि रोड शो कयलनि। एक घंटासँ बेसी समय धरि चलल एहि रोड शोमे प्रियंका गाँधी लगभग १२ मिनट धरि जनताकेँ सम्बोधित कयलनि। अपन संबोधनमे प्रियंका गाँधी पीएम मोदी पर कटाक्ष कयलनि। प्रियंका कहलनि “ई देश सत्यक पूजा कयलक अछि, सत्ताक नहिं, जखन कि पीएम मोदी मात्र सत्ताकेँ पूजैत छथि, सत्यकेँ नहिं।
रामनवमीक पाबनिकेँ स्मरण करैत ओ कहलनि जे भगवान राम सेहो सत्यक लेल लड़लाह। जखन रावण युद्ध करबाक लेल हुनक सोझाँ आयल तखन सभ शक्ति रावणक लग छल। मुदा भगवान राम नौ व्रत राखि सभ शक्ति अपना संग लऽ लेलनि। एकर बाद ओ रावणक सङ्ग युद्ध कयलनि आ सत्यक जीत भेल।
प्रियंका गाँधी प्रधानमंत्री मोदी पर कटाक्ष करैत कहलनि जे ओ छोट व्यापारी, गरीब आ मजदूरक लेल किछु नहिं कयलनि। पैघ उद्योगपतिक लेल १६ लाख करोड़ टाकाक ऋण माफ कयल गेल। भाजपा सरकार सदैव अमीरक जेब भरैत रहल अछि। गरीबकेँ किछु नहिं भेटल। भाजपा चुनावी बॉन्ड योजना सेहो अनने छल आ ओ एकरा गोपनीय राखय चाहैत छल। मुदा सुप्रीम कोर्ट नामक खुलासा करय केर आदेश दैत भाजपाकेँ बेनकाब कऽ देलक।
ओ कहलनि “जे कंपनी 180 करोड़क मुनाफा कमा रहल अछि, ओ कंपनी भाजपाकेँ ११०० करोड़ रुपया दान कऽ रहल अछि। ई पाइ कतएसँ आबि रहल अछि ? प्रधानमंत्री मोदी काला धन आनय केर लेल कहलनि। की आएल ? जीएसटी आयल, जे व्यापारी सभक कमर तोड़ि देलक।
ओ कहलनि जे सहारनपुरक लोकक लकड़ीक कारोबार ठप भऽ गेल अछि। एकटा समय छल जखन एतयसँ पैघ संख्यामे लकड़ी उत्पादक निर्यात होइत छल। ओ सेहो मोदी सरकारक अधीन बंद भऽ गेल। हम जनतासँ अपील करैत छी जे सपा-कांग्रेस गठबंधनक उम्मीदवार भाई इमरानकेँ भारी मतसँ जीतवाउ। १९ अप्रैलकेँ बेसीसँ बेसी मतदान करू।
