भारतीय जनता पार्टी (भाजपा) पूर्व प्रधानमंत्री मनमोहन सिंहक अंतिम संस्कारक बाद वियतनाम यात्राक लेल कांग्रेस अध्यक्ष राहुल गाँधीक आलोचना कयलक अछि। पार्टी प्रवक्ता शहजाद पूनावाला मंगल दिन कहलनि- देश शोकमे अछि आ राहुल पार्टी करय लेल विदेश गेलथि।
पूनावाला कहलनि, “डॉ. मनमोहन सिंहक निधनक बाद राष्ट्रीय शोक अछि। एम्हर लोकसभामे विपक्षक नेता राहुल गांधी छुट्टी केर प्राथमिकता देलनि आ विदेश चलि गेलाह। हुनकालोकनिक लेल नव वर्ष मनायब बेसी महत्वपूर्ण अछि।”
भाजपा प्रवक्ता कहलनि – राहुल विपक्षक नेता (एलओपी) छथि। हुनका लेल एलओपी केर मतलब लिडर ऑफ पार्टिइंग अर्थात पार्टी करयवाला नेता अछि। राहुल सार्वजनिक रूपसँ मनमोहन सिंहकेँ पिता जकाँ कहने छलाह। ओ लोकनि राष्ट्रीय शोकक अवधिमे विदेश जा कऽ स्वर्गीय प्रधानमंत्रीक अपमान कयलनि अछि।
भाजपा आईटी प्रकोष्ठक प्रमुख अमित मालवीय २९ दिसम्बरकेँ राहुल गाँधीक विदेश यात्रापर कटाक्ष कयने छलाह। ओ कहने छलाह जे राहुल गाँधी डॉ. मनमोहन सिंहक अस्थि विसर्जनमे शामिल नहि भेलाह।
३० दिसंबरकेँ एक्स पर मालवीय लिखलनि जे जखनि पूरा देश पूर्व प्रधानमंत्रीक निधनपर शोक मना रहल अछि, राहुल नव वर्ष मनयबाक लेल वियतनाम गेलाह।
ओ आगू लिखलनि, “राहुल गांधी डॉ. सिंहक मृत्युक राजनीतिकरण कयलनि आ राजनीतिक लाभक लेल एकर लाभ उठौलनि। गाँधी परिवार आ कांग्रेस सिखसभसँ घृणा करैत अछि। कहियो नहि बिसरी जे इन्दिरा गाँधी दरबार साहिबकेँ अपवित्र कयने छलीह।”
कांग्रेस नेता पवन खेड़ा ३० दिसम्बरकेँ कहने छलाह जे अमित मालवीय आरोप लगओने छलाह जे डॉ. मनमोहन सिंहक अस्थि विसर्जनमे कांग्रेस आ गांधी परिवारक कोनो नेता शामिल नहि भेलाह। मनमोहन सिंहक परिवारक निजताकेँ ध्यानमे रखैत कांग्रेस पार्टीक कोनो नेता विसर्जनमे शामिल नहि भेल।
खेड़ा कहलनि, “डॉ. मनमोहन सिंहक अंतिम संस्कारक बाद सोनिया जी आ प्रियंका जी हुनक परिवारसँ भेंट कयलनि। बातचीतमे ई अनुभव कयल गेल जे अन्तिम संस्कारमे परिवारकेँ निजता नहि भेटल। परिवारक किछु सदस्य चिता स्थल पर पर्यंत नहि पहुँचि सकलथि। अस्थि विसर्जन भावनात्मक रूपसँ कठिन समय होइत अछि, तेँ हम परिवारक गोपनीयताक ध्यान रखलहुँ।”
कांग्रेस सांसद मणिकम टैगोर कहने छलाह, “संघी लोक ध्यान भटकाबय केर राजनीति कहिया रोकत ? जाहि तरहें मोदी डॉ. साहबकेँ यमुनाक तट पर अन्तिम संस्कारक लेल स्थान देबासँ मना कऽ देलनि आ हुनक मंत्री लोकनि डॉ. साहबक परिवारकेँ दरकिनार कऽ देलनि ओ शर्मनाक अछि। जँ राहुल निजी दौरा पर छथि तखनि अहाँक की समस्या अछि ? नव सालमे सब किछु ठीक भए जाएत।”
