आजुक समय मे धोखाधड़ी करय वाला केर कमी नहिं अछि, धोखेबाज आंखिक नीचासँ धोखा दऽ दैत अछि आ सामनेवालाकेँ खबरि तक नहिं लगैत छैक, मुदा जखन बादमे पता चलैत अछि तखन बहुत देर भऽ गेल रहैत छैक।
मुजफ्फरपुरक किछु ब्यूटी पार्लर महिलाक संग सेहो एहने घटना भेल, बतबैत चली जे आइ-काल्हि सौंदर्य प्रतियोगिता, फैशन प्रतियोगिता रोज भऽ रहल अछि। एकर फायदा उठबैत मिथिला क्षेत्रीय बिहारक मुजफ्फरपुरक नई बाजारक निवासी पूजा उप्पल, जे ब्यूटी पार्लर चलाबैत छथि। हुनका लग एकटा जालसाज पहुँचि हुनका आ हुनक सम्पर्कमे रहनिहार महिलासभकेँ लगभग लाख टाकाक धोखा देलनि।
पूजा कहलनि जे एकटा व्यक्ति पार्लरमे पहुँचल। ओ अपन परिचय सिवानक निवासी अंशु कुमार सिंहक रूपमे देलनि। ओ बतौलनि जे हुनकर कंपनी ड्रीम ऑफ यूज ८ मई, २०२४केँ शेरपुरक एकटा होटलमे वैश्विक सौन्दर्य प्रतियोगिता आयोजित करत। एहिमे ४० फीमेल मेकअप आर्टिस्ट भाग लेतीह, जाहिमेसँ तीनटा विजेता होयत। हुनका सभकेँ मलेशिया पठाओल जायत आ संगहि ५ लाख टाकाक इनाम देल जायत आ रहन-सहन आ भोजनक पूरा खर्च कंपनी वहन करत। धोखेबाज पूजाकेँ आगू कहलक जे मुम्बईक ब्यूटी बैनरसँ तीनटा न्यायाधीश आओत आ तीनटा न्यायाधीश पारुल गर्ग, शहनाज हुसैन आ मलेशियासँ शैली अयतीह आ ई तीनू न्यायाधीश भाग लेनिहार उम्मीदवारक जज करत।
ओ पूजासँ सुरक्षाक पैसाक नाम पर २ हजार टाकाक माँग सेहो कयलनि आ कहलनि जे एकरा वापिस कऽ देल जायत। पूजा हुनकर बात पर पहिने २ हजार टाका देलनि। तखन आरोपी पार्लरमे मेकअप ट्रॉली मंगाबय के नाम पर १७,३८० रुपया लेलक। एहिना आरो संपर्कित सभसँ लेलक। निर्धारित समयक बादो जखन ट्रॉली नहि भेटल तखन फोनसँ सम्पर्क कयल गेल, तखन कहलनि जे ऑर्डर भगवानपुरमे अछि। एकर बाद आरोपी केर नंबर बंद बताबय लागल। जखन ओ होटलमे पूछताछ कयलनि तखन हुनका कहल गेल जे ओ पहिनेसँ चलि चुकल छथि। पूजा नगर थानामे एहि पूरा मामिलाक जानकारी देलनि। पुलिस एकर जांचमे जुटि गेल अछि।
