सोमकेँ फ्रांसक मार्सिले’मे रूसी वाणिज्य दूतावासमे एकटा विस्फोट भेल। रूसी विदेश मंत्रालयक प्रवक्ता मारिया जखारोवा कहलनि जे ई एकटा आतंकवादी हमला जकाँ बुझाइत अछि। विस्फोट स्थल पर लगभग ३० अग्निशामक दल पठाओल गेल।
यद्यपि, रूसी समाचार एजेंसी फ्रांसक एकटा रिपोर्टक हवाला दैत कहलक जे एहि घटनामे कोनो हताहत होयबाक सूचना नहिं अछि। एकटा आओर पत्रिकाक रिपोर्टक हवालासँ कहल गेल अछि जे अज्ञात लोक वाणिज्य दूतावासक बगीचामे दूटा पेट्रोल बम फेंकि देलक। घटनास्थल लग एकटा चोरी भेल कार सेहो भेटल।
जखारोवा कहलनि जे रूस एहि घटनाक तत्काल आ गहन जाञ्चक माँग करैत अछि आ रूसी विदेशी मिशनक सुरक्षा बढ़यबाक उपायक आह्वान करैत अछि। ओ कहलनि जे मार्सिलेमे रूसी वाणिज्य दूतावासमे भेल विस्फोटमे आतंकवादी हमलाक सभ संकेत अछि। हम मांग करैत छी जे फ्रांस एहि घटनाक तत्काल आ गहन जाँच करय आ विदेशमे स्थित रूसी विदेशी मिशनक सुरक्षा बढ़यबाक उपाय करय।
रूसक विदेश खुफिया सेवा (एसवीआर) १९ फरवरीकेँ चेतौनी देलक जे यूक्रेनी सरकार यूरोपमे, विशेष रूपसँ जर्मनी, बाल्टिक आ स्कैंडिनेवियाई (नॉर्वे, स्वीडन आ डेनमार्क) देशसभमे रूसी दूतावास पर आतंकवादी हमलाक योजना बना रहल अछि।
एहिसँ पहिने फ्रांसमे चाकू हमलाक मामिला सेहो सामने आयल छल, जाहिमे एकटा व्यक्तिक मृत्यु भऽ गेल छल आ तीनटा घायल भऽ गेल छल। राष्ट्रपति इमैनुएल मैक्रों एहि हमलाकेँ इस्लामी आतंकवाद बतौलनि। जर्मन सीमा लग मुलहाउसमे भेल एहि घटनाक परिणामस्वरूप एकटा पुर्तगाली नागरिकक मृत्यु भऽ गेल। एहि घटनामे सात’टा पुलिस अधिकारी सेहो घायल भऽ गेलाह।
