अनंतनाग जिलाक पर्यटन स्थल पहलगाममे भेल आतंकी हमलामे एकटा पर्यटकक मृत्यू भऽ गेल अछि जखन कि 7 अन्य घायल भेल अछि, जकरा स्थानीय अस्पतालमे इलाज लेल भर्ती कएल गेल अछि। ई हमला तखनि भेल जखनि पर्यटक अपन परिवार केर संग घुड़सवारी कऽ रहल छल। आतंकी हमलाक जिम्मेदारी पाकिस्तान समर्थित आतंकी संगठन ‘कश्मीर रेजिस्टेंस’ लेलक अछि।
आतंकवादी संगठन ‘कश्मीर रेजिस्टेंस’ सोशल मीडिया पर एकटा पोस्ट कय कहलक की गैर-स्थानीय लोककेँ 85000 सँ बेसी निवास-पत्र जारी कएल गेल अछि, जाहिसँ एतय जनसांख्यिकीय परिवर्तन केर रास्ता खुजल अछि। इ गैर-स्थानीय लोक पर्यटक बनिक अबैत अछि, निवास-पत्र प्राप्त करैत अछि आ फेर एहेन व्यवहार करय लागैत अछि जेना ओ एही धरतीक मालिक होय। नतीजतन, अवैध रूपसँ रहय वला पर हिंसा भ’ सकैत अछि।
हमलाक तुरंत बाद सुरक्षा बल क्षेत्रकेँ घेरि लेलक आ सघन तलाशी अभियान शुरू कय देलक अछि। स्थानीय पुलिस आ सेना मिलि कय आतंकीक खोजमे अछि। पूरा क्षेत्रमे सुरक्षा व्यवस्था कड़ा कय देल गेल अछि आ संवेदनशील क्षेत्रमे अतिरिक्त बल तैनात कएल गेल अछि। एकर अलावा पहलगाम पहुँचय वला बाकी पर्यटककेँ रोकि देल गेल अछि।
प्रशासन आम नागरिकसँ सतर्क रहबाक आ कुनु संदिग्ध गतिविधिक सूचना तुरंत सुरक्षा बलकेँ देबाक अपील कयलक अछि। एही हमलासँ घाटीमे एक बेर फेरसँ दहशतक माहौल पैदा भ’ गेल अछि। एहेन किछु वर्षक बाद देखल गेल अछि जे आतंकवादी पर्यटककेँ निशाना बनौलक गेल अछि।
2019 मे अनुच्छेद 370 हटलाक बाद जम्मू-कश्मीरकेँ पूर्ण केंद्र शासित प्रदेश बना देल गेल। एकर बाद नव कानूनक तहत लोककेँ स्थायी निवासक दर्जा भेटि सकैत अछि जे लोक 15 वर्ष वा ताहिसँ अधिक समयसँ जम्मू-कश्मीरमे रहि रहल छथि। वा जिनकर माता-पिता अथवा अभिभावक सरकारी सेवामे 10 वर्ष जम्मू-कश्मीरमे रहि चुकल छथि। एहि कानूनक तहत, किछु आओर श्रेणीक लोक सेहो डोमिसाइलक लेल पात्र छथि। एहि फैसलाक कारण आतंकवादी बौखला गेल अछि।
जम्मू-कश्मीरक उपराज्यपाल मनोज सिन्हा हमलाक निंदा कएलन्हि। एलजी कहला जे हम पहलगाममे पर्यटक पर भेल कायरतापूर्ण आतंकी हमलाक कड़ाईसँ निंदा करैत छी। हम लोककेँ विश्वास दियाबैत छी जे एही घृणित हमलाक पाछू जे अछि, तकरा बख्शल नहि जायत। डीजीपी आ सुरक्षाकर्मीसँ बात कएल गेल अछि। सेना आ जम्मू-कश्मीर पुलिसक टीम सभ इलाकामे पहुंचल अछि आ तलाशी अभियान शुरू कएल गेल अछि। जिला प्रशासन आ स्वास्थ्य अधिकारीकेँ पहलगाममे भर्ती लोककेँ तत्कालीक चिकित्सा सुविधा प्रदान करबाक निर्देश देल गेल अछि। एकटा घायल पर्यटककेँ जीएमसी अनंतनाग पहुंचौल गेल अछि। हम सभ घायलक शीघ्र स्वस्थ होयबाक प्रार्थना करैत छी।
जनतब जे पीएम मोदी पहलगाम आतंकवादी हमला पर गृहमंत्री अमित शाहसँ फोन पर बातचीत कयलनि आ सभ उचित कदम उठेबाक लेल कहलनि। प्रधानमंत्री गृह मंत्रीकेँ घटनास्थल पर जयबाक बात सेहो कहलनि। आतंकी हमलाक बाद गृहमंत्री अमित शाह अपन घर पर बैसार बजेलथि। एही उच्चस्तरीय बैसरमे गृह सचिव आ आईबी प्रमुख सहित अनेक वरिष्ठ अधिकारी सभ उपस्थित छलथि। जम्मू कश्मीरसँ उपराज्यपाल, सीआरपीएफ डीजी, जम्मू-कश्मीर डीजी, सेनाक अधिकारी आ अनेक अन्य वरिष्ठ अधिकारी सेहो वीडियो कांफ्रेंसिंगसँ जुड़ल रहथि।
