बिहारक पूर्व मुख्यमंत्री लालू यादव केर फेरसँ राष्ट्रीय जनता दलक राष्ट्रीय अध्यक्ष बननाय निश्चित मानल जा रहल अछि। एहेनमे भाजपा नेता आ केंद्रीय मंत्री नित्यानंद राय मंगलदिन लालू यादव पर कटाक्ष करैत कहलनि जे 13म बेर राजदक अध्यक्ष बनलासँ लालू यादव पार्टीक ‘तेरहवी’ पूरा कय देलनि।
पटनामे पत्रकारसँ गप करैत केंद्रीय मंत्री नित्यानंद राय राजदकेँ पारिवारिक पार्टी बतेलथि आ कहलनि जे एक बेर फेर लालू यादवकेँ अध्यक्ष बना कए राजद इ साबित कय देलक जे इ पार्टी परिवारसँ आगू नहि जा सकैत अछि। ई एकटा पारिवारिक पार्टी अछि जे मात्र भ्रष्टाचार लेल बनल अछि। ओ कहलनि जे लोकतंत्रमे परिवारवाद राजतंत्रक निशानी अछि। ई लोकतंत्रक उपहास थिक। आब राजदक लोक सभ कहैत छथि जे पार्टीमे ई वंशवाद ठीक नहिं अछि। जनता राजदकेँ सबक सिखाओत।
केंद्रीय मंत्री नित्यानंद राय कहलनि, “बिहारक जनताकेँ लोकतंत्र पर विश्वास अछि। भारतक व्यवस्था लोकतांत्रिक अछि। संविधान लोकतंत्रक भावना देलक अछि। भारतकेँ दुनियाक सबसँ पैघ लोकतंत्र कहल जाइत अछि। दोसर दिसि राहुल गांधी आ तेजस्वी यादवक परिवार, परिवार व्यवस्थामे रहब सीखने अछि। भविष्यमे सेहो ककर नाम तय होयत। अध्यक्ष पद ओहि परिवारसँ बाहर नहि जायत।” ओ आगू कहलनि कि ‘जे लोकतंत्रक सच्चा उपासक अछि ओ राजदमे नहि रहि सकैत अछि।’
एतय ईरानसँ भारतीय नागरिकक वापसी पर ओ कहलनि कि जहियासँ नरेंद्र मोदी देशक प्रधानमंत्री बनलथि, तहियासँ प्रधानमंत्री मुसीबतमे फंसल लोककेँ वापस आनय केर काज कय रहल छथि। कोरोनाक समय होय वा दू देशक बीच युद्धक समय। एतेक धरि जे आन देशक नागरिक सेहो भारतीय तिरंगा लऽ कऽ वापस आबि गेल छथि आ फेर अपन देश चलि गेल छथि।
