बिहारक राजस्व आ भूमि सुधार मंत्री डॉ. दिलीप कुमार जायसवाल कहलनि जे राज्यमे जल्दिये दस हजार अमीन बहाल कयल जायत। ओ अपर मुख्य सचिव केके पाठकक बारेमे सेहो बयान देलनि।
बिहारक तेज तर्रार अपर मुख्य सचिवक राजस्व विभागमे स्थानान्तरणक बाद एहि विभागक अधिकारी-कर्मचारीमे हलचल मचि गेल अछि। दोसर दिस राजस्व आ भूमि सुधार मंत्री डॉ. दिलीप कुमार जायसवाल विभागमे व्याप्त भ्रष्टाचारक बारेमे बड़का बयान देलनि अछि। किशनगंज पहुँचल राजस्व आ भूमि सुधार मंत्री डॉ. दिलीप कुमार जायसवाल प्रेस कॉन्फ्रेंसक दौरान कहलनि कि क्षेत्रीय कार्यालयमे भ्रष्टाचार चरम पर अछि। एहि लेल हम निर्णय लेलहुं जे यदि कोनो राजस्व कर्मचारी दू सालसँ बेसी समयसँ नगर निकाय वा आन जगह पर फंसल अछि तऽ ओकरा पंचायत भेजल जाए। ओ कहलनि जे सभ जिला मजिस्ट्रेटकेँ राजस्व कर्मचारीक स्थानान्तरण करबाक निर्देश देल गेल अछि।
बिहारमे जमीनसँ जुड़ल मामिला अटकल अछि। डॉ. जायसवाल आगू कहलनि जे बिहारमे जल्दिये दस हजार अमीन बहाल कएल जाएत। ओ कहलनि जे अमीनक कम संख्याक कारण पूरा बिहारमे जमीनसँ जुड़ल मुद्दा कतेको सालसँ अटकल अछि। ई एकटा पैघ समस्या अछि। एकरा दूर करबाक लेल एहि मासक अन्त धरि १०,००० अमीनकेँ बहाली करबाक तैयारी कयल जा रहल अछि।
आगा राजस्व मंत्री बतौलनि जे राजस्व विभाग केर पूर्ण डिजिटलीकरण कयल जा रहल अछि। ओ कहलनि जे एकर लाभ राज्यक जनताकेँ भेटत। अगिला तीन मासमे लोककेँ जमीनसँ जुड़ल कोनो काजक लेल विभागमे नहि जेबाक आवश्यकता होयत। घरमे बैसि सभ काज ऑनलाइन कएल जा सकैत अछि। अपर मुख्य सचिव केके पाठकक बारेमे पूछल गेल सवाल पर ओ कहलनि कि मंत्रालय केर ईमानदारीसँ काज करय, एकर हम शुरूआत कयलौंह अछि। ओ कहलनि जे विभागमे ईमानदार अधिकारीक आवश्यकता अछि आ भ्रष्टाचार मुक्त मंत्रालयक लेल आवश्यक टीमक कमीकेँ आब दूर कयल गेल अछि।
