आब बजलाह तेजस्वी जे ४ जूनक बाद नीतीश कुमार लेताह पैघ फैसला
*
पटना
*
सत्ताक सुगंध जखनि एक बेरि लागि जाइत छैक, तखनि सत्ता जयबाक छटपटाहट सतत कचोटति रहैत अछि। नीतीश कुमार तेजस्वी यादवकेँ तऽ सत्ताक सुख सुंघा देलखिन, मुदा जखनि देखलनि जे ई तऽ सभटा श्रेय असगरे गटकय लागल छथि, तुरत लगाम खिंचलनि आ पलटी मारि पुनः राजगमे आबि गेलाह। आब तेजस्वी यादवकेँ ई अप्रत्याशित घटनाक्रम कोनो बज्रपातसँ कम नहिं बुझायल। पुनः लोकसभा चुनावमे तेजस्वी यादव ओहि १७ महिनाक सभटा श्रेय अपने लय प्रचार करय लगलाह, मुदा तेजस्वी यादवकेँ ई बुझल छनि जे पुनः सत्ताक सुख बिना नीतीश चाचा केर संभव नहिं, फलतः सतत नीतीश चाचा केर प्रति नरम रुख रखैत अपरोक्ष रुपसँ मनौव्वलमे छथि आ ताहि क्रममे पुनः बयान देलनि जे नीतीश कुमार ४ जूनक बाद कोनो पैघ फैसला लेताह। मुदा भले ही नीतीश कुमार पलटय लेल मशहूर होथि, मुदा भरिसक आब पुनः तेजस्वी यादवक संग जयबाक रिस्क नहिं लेताह, कारण एहि १७ महिनाक श्रेय जाहि तरहें तेजस्वी यादव प्रायः लऽ लेलथि, निश्चित रुपसँ आब नीतीश कुमार ई भलीभांति समझि गेल छथि जे आगू जँ सत्ता हिनका पुनः सुंघेलौंह तऽ हमरा ई पुरा चापि देत, तें कतबो चप-उतार तेजस्वी यादव दैत रहौथ आब प्रायः चच्चा फँसयवाला नहिं।
लोकसभा चुनाव आब अपन अंतिम चरणमे अछि। एम्हर सभ दलक नेता हार आ जीत केर लऽ कऽ एक दोसरा पर कटाक्ष करय लागल छथि, मुख्यमंत्री नीतीश पर अक्सर हमला करय वाला राजद नेता तेजस्वी यादव एक बेर फेर हुनका बारेमे बड़का बात कहलनि अछि। तेजस्वी यादव मंगल दिन पटनामे पत्रकारक सवालकेँ जवाब दैत साफ कहलनि कि मुख्यमंत्री चुनाव परिणामक बाद यानी ४ जूनक बाद फेरसँ बड़का फैसला लऽ सकैत छथि। ओ इहो दावा कयलनि अछि जे प्रधानमंत्री नरेन्द्र मोदी एहि बेर प्रधानमंत्री नहिं बनताह।
एम्हर तेजस्वी यादव एकटा पैघ दावा कयलनि जे ४ जूनक बाद मुख्यमंत्री नीतीश कुमार अपन पार्टीकेँ बचाबय आ पिछड़ल राजनीति करबाक लेल कोनो पैघ निर्णय लऽ सकैत छथि।
ओ कहलनि जे नरेन्द्र मोदी प्रधानमंत्री नहिं बनि रहल छथि, हुनकर सफाया कऽ देल गेल अछि। ओ हारि गेलाह, देशमे एहन सरकार बनय जा रहल अछि। जाहिसँ युवाकेँ नौकरी भेटत आ महंगाई दूर होएत। जनता आब एहि सरकारकेँ खारिज कए देलक अछि।
सोमदिन पटनामे एकटा छात्रक हत्या पर ओ कहलनि जे आब ई लोक किएक नहिं चिचिया रहल अछि। पूरा भाजपा राज्यमे कानूनी व्यवस्थाक स्थिति खराब अछि। बहुत रास मामिला केर ठंढ़ा बस्तामे डालि देल गेल अछि। जखन हम सभ आन्दोलन कयलौंह तखन किछु कारवाई भेल, मुदा स्थिति एतेक खराब अछि जे आब ई लोक जंगलराज नहिं कहि रहल अछि। ई लोकसभ सड़कपर नहिं लेटि रहल छथि आ ने कानून-व्यवस्थाक लेल चिचिया रहल छथि।
६ चरणमे भेल लोकसभा चुनावकेँ लऽ कऽ इंडिया गठबन्धनक विश्वास बहुत बढ़ल अछि। गठबन्धनक दावा अछि जे एहि बेर जनता हुनका बहुत नीक प्रतिक्रिया देलक अछि आ ४ जूनकेँ इंडिया गठबन्धन जीतय जा रहल अछि आ ओकर बाद देशमे इंडिया गठबन्धनक सरकार बनत। एहि दावाक बीच तेजस्वी यादव इशारामे कहि देलनि जे सीएम नीतीश चारि जूनक बाद पुनः पाला बदलि सकैत छथि।
