बिहारक पूर्व मुख्यमंत्री आ राष्ट्रीय जनता दल (राजद) केर सुप्रीमो लालू यादव अपन बड़का बेटा तेज प्रताप यादवकेँ पार्टीसँ छह सालक लेल निष्कासित कऽ देलनि अछि। ई जनतब ओ स्वयं अपन सोशल मीडिया प्लेटफॉर्मक द्वारा देलनि। लालू यादव कहलनि अछि जे ज्येष्ठ पुत्रक गतिविधि, लोकाचार आ गैर जिम्मेदाराना व्यवहार हमर पारिवारिक मूल्य आ संस्कारक अनुरूप नहि अछि। आगामी समयसँ पार्टी आ परिवारमे हुनकर कोनो प्रकारक भूमिका नहि रहत आ छह सालक लेल निष्कासित कएल जाइत छथि।
राजद प्रमुख लालू यादव शनिकेँ सोशल मीडिया प्लेटफॉर्म एक्स पर लिखलनि, “निजी जीवनमे नैतिक मूल्यक अवहेलना सामाजिक न्यायक लेल सामूहिक संघर्षकेँ कमजोर करैत अछि। जेठ पुत्र केर गतिविधि, लोक आचरण आ गैर जिम्मेदाराना व्यवहार हमर पारिवारिक मूल्य आ संस्कार सभक अनुरूप नहि अछि। एहि कारणे, उपरोक्त परिस्थितिक चलते हुनका पार्टी आ परिवारसँ दूर करैत छी। आबसँ पार्टी आ परिवारमे हुनकर कोनो प्रकारक भूमिका नहिं रहत। हुनका पार्टीसँ छह वर्षक लेल निष्कासित कयल जाइत अछि।” ओ आगू लिखलनि, “अपन निजी जीवनक भला-बुरा आ गुण-दोष देखयमे ओ स्वयं सक्षम छथि। जे लोक हुनका संग संबंध राखत, ओ स्वविवेकसँ निर्णय लेत। लोक जीवनमे लोकलाजक हमेशा हिमायती रहल छी। परिवारक आज्ञाकारी सदस्य सभ सार्वजनिक जीवनमे एकहि विचारकेँ अंगीकार कय अनुसरण कयलनि अछि। धन्यवाद।”
जनतब जे एक दिन पहिने शनिकेँ तेज प्रताप यादवक सोशल मीडिया पेज पर एकटा पोस्ट वायरल भेल छल। सोशल मीडिया पर दावा कएल गेल छल जे ई पोस्ट तेज प्रताप यादव द्वारा कएल गेल अछि, जाहिमे हुनका संग एकटा युवतीकेँ देखल गेल छल। ओहि पोस्टमे विवरण छल, “हम तेज प्रताप यादव छी आ हमरा संग जे तस्वीरमे देखाइत छथि, हुनकर नाम अनुष्का यादव अछि। हम दुनू एक-दोसरकेँ 12 वर्षसँ जानैत छी आ प्रेमो करैत छी। हम 12 वर्षसँ रिलेशनशिपमे छी।”
हालाकि, एहि पोस्टसँ जुड़ल स्क्रीनशॉट केर वायरल होयबक किछु घंटा बाद तेज प्रताप यादवक दिसिसँ सफाई सेहो आयल। ओ सोशल मीडिया पर लिखलनि, हमर सोशल मीडिया प्लेटफॉर्मकेँ हैक कय हमरा आ हमर परिवारकेँ परेशान आ बदनाम कयल जा रहल अछि, हम अपन शुभचिंतक आ फॉलोअरसँ अपील करैत छी जे ओ सतर्क रहथि आ केओ अफवाह पर ध्यान नहि दिअ।
तेज प्रताप यादवक पोस्टक कारण सोशल मीडिया पर विवाद सेहो बढ़ि गेल। बिहार भाजपाक नेता निखिल आनंद एकटा पोस्ट लिखलनि आ तेज प्रताप यादवक ऐश्वर्यासँ वियाहसँ जुड़ल प्रश्न सेहो पुछलनि।
ओ पोस्टमे लिखलनि, “जँ अनुष्का यादवसँ 12 सालसँ प्रेम छल अर्थात् 2012-13 सँ तखनि 2018 मे ऐश्वर्यासँ विवाह करैत काल एहि बातक रहस्योद्घाटन कियैक नहि भेल कि पहिनेसँ प्रेम अछि आ ओहीसँ विवाह होय। मुदा, ऐश्वर्या राय आ हुनकर परिवारकेँ धोखा देलियै, अपने बहुत खराब केलियै। अपनेकेँ तँ 2018 मे ऐश्वर्यासँ विवाह करबाक पहिने एही बातक खुलासा कए देब चाहैत छल। तथ्य छुपा कय ऐश्वर्या आ हुनकर परिवार संग झूठ, फरेब, धोखाधड़ी केलियै, तकरा लेल सार्वजनिक रूपसँ अफसोस प्रकट कय माफी मंगबाक चाही।
ओतय एही मामिलामे तेजस्वी यादव कहलनि, राजनीतिक आ निजी जीवन अलग होइत अछि। निजी जीवनक निर्णय लेबाक हुनक अधिकार अछि। राजद केर नेता छथि, ओ पोस्ट केर माध्यमसँ अपन भावना स्पष्ट कय देलनि।
जन सुराजक संस्थापक प्रशांत किशोर आरजेडी सुप्रीमो लालू यादव द्वारा तेज प्रताप यादवकेँ पार्टी आ परिवारसँ बेदखल करय पर प्रतिक्रिया देलनि। ओ कहलनि कि लालू यादव केकरा परिवारसँ निकालि रहल छथि वा ककरा राखि रहल छथि, ताहिसँ बिहारकेँ की लेना देना अछि। ई सभ जातिक राजनीति करय बला अछि। की ओ तेजस्वीकेँ छोड़ि यादव जातिसँ ककरो दोसर योग्य व्यक्तिकेँ मुख्यमंत्रीक चेहरा घोषित कऽ सकैत छथि ?
एखनहुँ लालू यादव तेजस्वी यादवकेँ सीएम बनबय चाहैत छथि। हम ओपन कहलौं, राजद केर दिसिसँ जँ आई यादव जातिसँ आर किनको लालू सीएम केर चेहरा घोषित करैत छथि तँ जन सुराज हुनकर समर्थन करत।
