मुंबई आतंकी हमलाक मुख्य साजिशकर्ता तहव्वुर हुसैन राणासँ राष्ट्रीय जांच एजेंसी (एनआईए) केर अधिकारी सभ प्रतिदिन 8 सँ 10 घंटा पूछताछ कय रहल छथि, जाहिसँ एहि हमलाक पाछाँ ठोस साजिशक पता लगायल जा सकए। राणाकेँ पछिला सप्ताह अमेरिकासँ प्रत्यर्पित कए भारत लाओल गेल छल।
सरकारी स्रोत सभ सोमदिन कहलनि कि एनआईए’क अधिकारी राणा’क मेडिकल जांच सुनिश्चित कऽ रहल अछि आ ओकरा ओकर वकीलसँ भेंट करबाक अनुमति सेहो देल गेल अछि। दिल्लीक एकटा अदालत शुक्रदिन भोर ओकरा अमेरिका’सँ प्रत्यर्पित कएलाक बाद जांच एजेंसीकेँ 18 दिनक हिरासतमे सौंपि देलक अछि। स्रोतसँ जनतब अछि कि एनआईए केर जांचकर्ता सभ द्वारा राणा’सँ प्रतिदिन लगभग 8 सँ 10 घंटा तक पूछताछ कएल जा रहल अछि, जाहिसँ 2008मे लश्कर-ए-तैयबा द्वारा कएल गेल कायराना हमलाक पाछाँक ठोस साजिशक पता लगायल जा सकए। एहि हमलामे 166 लोकक मृत्यु भेल आ 238 सँ अधिक लोक घायल भेल रहय।
एकटा सूत्र कहलक, पूछताछक दौरान राणा सहयोग कऽ रहल अछि। जया रॉय केर नेतृत्वमे एनआईए अधिकारी सब ओकरासँ लगातार पूछताछ कऽ रहल अछि। सूत्र सब कहलक जे राणा एखन धरि केवल तीन चीजक मांग कएलक अछि। एकटा कलम, कागजक शीट वा नोटपैड आ कुरान। जे एनआईए द्वारा ओकरा मुहैया कराएल गेल अछि।
सूत्र सब कहलक जे राणा एखनि धरि भोजनसँ संबंधित किछु विशेष मांग नहि कएने अछि आ ओकरा लेल बनायल मानक प्रोटोकॉलक अनुसार खाना देल जा रहल अछि, जे कोनो अन्य आरोपीकेँ देल जाइत अछि। सूत्र सब कहलक जे खूंखार आतंकी हमलाक साजिश रचय वाला राणाकेँ सीजीओ कॉम्प्लेक्समे एजेंसीक मुख्यालयक भीतर एकटा उच्च-सुरक्षा सेलमे राखल गेल अछि आ चौबीसों घंटा सुरक्षाकर्मी ओकर सुरक्षामे तैनात रहैत अछि।
